Bam shngiam ka ding ïa lai tylli ki dukan ha Ïew Rangblang-Pombriew, mynsaw 5 ngut

0

Mawkyrwat, Jymmang 11: Ka ding kaba klang ha ka janmiet jong ka 10 tarik u Jymmang, 2023 ka la bam duh ïa ki 3 tylli ki dukan kiba don ha ïew Rangblang-Pombriew, Mawkyrwat, South West Khasi Hills District.
Katkum ka jingïathuh napoh ka Fire & Emergency Service, South West Khasi Hills District la ong ba kane ka jingjia ka la jia ha ka janmiet jong ka sngi balang ha ka por kumba 6:30 bad 3 tylli ki dukan ki la ktah jur bad ar tylli ki ïing ki la shah ktah malu mala.
Ki dukan kiba la shah ktah ki long ar tylli ki dukan jong ka kong Kiti Thongni ka dukan die tiar (General Store) bad dukan sha bad ka dukan rit (Mini General Store-cum-Stationaries) jong ka kong Ailinda Thongni.
Shuh shuh la ïathuh ruh ba ha kane ka jingjia ki la don ruh kiba mynsaw ha kaba 5 ngut na ki ki la shah ktah kata ka kong Merial Kharjahrin (45 snem), kong Ailinda Thongni (42 snem), kong Olinda Thongni (30 snem), iwei i khyllung rit bad u Sunu Khanak (32 snem) na Bhiwani-Haryana bad ar ngut na ki kiba la mynsaw malu mala kata u bah Benning Thongni (32 snem) bad u bah Robert Jyrwa (55 snem).
Ka jinglut ha kane ka jingjia la antad ba ka la poi haduh 14 lak tam ei ei bad ïa ka daw jong kane ka jingjia la antad ba ka dei ka jingthut jong ka bording.

Leave A Reply

Your email address will not be published.