La plie pyrda ïa ka lympung ïalehkai U-12 ha Mawkyrwat, 39 kynhun kiba ïashim bynta

Mawkyrwat, Jymmang 11: Ka ophis jong u District Sports Officer, South West Khasi Hills District mynta ka sngi u la ïoh ban plie pyrda ïa ka lympung ïalehkai kynjatbol ba la tip kum ka Chief Minister’s Mawkyrwat Block Level Under-12 Years Football Tournament 2023 ba la pynlong hapoh madan Saitsnad, Mawlangwir, South West Khasi Hills District ha kaba u bah S.K. Budnah, President jong ka Mawlangwir Sports Club u la long kum u kongsan.
Ha kane ka lympung ïalehkai kynjatbol kiba la wan ïashimbynta ki don baroh 39 tylli ki kynhun kata 33 jong ki shynrang bad 6 jong ki kynthei.
U kongsan uba la wan plie pyrda ïa kane ka lympung ïalehkai u dei u bah S.K. Budnah, President jong ka Mawlangwir Sports Club ha ryngkat ka jingïadonlang ki nongtrei napoh ka ophis u District Sports Officer, South West Khasi Hills District, u Secretary Shnong Mawlangwir, u bah Kolan Lyngdoh, u Secretary ka Mawlangwir Sports Club, u bah A.B. Shylla lem bad kiwei de.
Haba phai ha ki jingïalehkai ba la pynïaleh mynta ka sngi, ka Mawbidong Presbyterian Upper Primary School ka la jop da 9 – 0 ïa ka Kyntu Lajong, ka Rangjadong Sports Club da 4 – 0 ïa ka Pyndensakwang COC Secondary School, ka Nineset Secondary ka la shah rem da 12 – 0 kol ha ka Photjaud-Rangthong Sports Club, ka Nonglang Sports Club ka la jop da 4 – 2 kol ïa ka Mawthynrew Youth Sports Club ha ka Tie Breaker.
Nangta, ka Sakwang Sports Club ka la shah rem da 1 – 0 ha ka Nongbah Marshilong Sports Club, ka Kerlin Secondary School ka shah rem ha ka Bethel da 2 – 0 kol, ka Three Broder ka la jop da 2 – 1 kol ïa ka Umsaitshriew Sports & Cultural Club, ka Mawbrei Lower Primary School ka la jop da 4 – 0 kol ïa ka Little Star Higher Secondary School, Mawkyrwat bad ka St, Vianney’s English School ka la jop da 1 – 0 kol pyrshah ïa ka Mawlangwir Sports Club.
Katba ha ka jingïalehkai jong ki khynnah kynthei pat ka Ninestet Secondary School ka la jop da 8 – 0 kol ïa ka Mawkyrwat Presbyterian Secondary School.