Myntoi ki nongrep na ki 10 shnong na ka jingai jinghikai ki ophisar ka ICAR

0

Nongstoiñ, Jymmang, 11: Namar ba ka pyrthei shi tyllup ka la ithuh ïa kane ka sngi kum ka sngi ba kyrpang jong u krai kaba la tip kum ka International Year of Millets, na ka liang ka ICAR hynne ka sngi la pynlong ka jingïakynduhlang bad ki nongrep bapher bapher ha ha phyllaw ïing jong u bah Spingshon Marshara ha ka shnong Mawduh, ha kaba ka Dr. D.Laloo, u Dr. A.K Singh bad kiwei kiwei ki ophisar na ka ICAR Umïam ryngkat bad ki katto katne ngut ki khynnah pule Phd ki la ïadon ryngkat.
Ha kane ka sngi ki nongrep na ki shiphew tylli ki shnong kiba don ha katei ka thaiñ, ki la wan ban ïashimbynta bad ki la ïoh shibun ki jingmyntoi na ka jingpynshai jong kitei ki ophisar ha kaba ïadei bad ka jingmyntoi lada ki nongrep ki trei shitom ha ka kam ban rep ban riang.
Ha kaba ïadei bad ka jingrep ïa u krai, u Dr A.K.Singh haba pynshai sha ki nongrep u la ong ba u krai u dei u mar rep u ba donkam haduh katta katta, namar lada ki nongshong shnong ki bam ïa ki jingbam ba la shet na u krai, ka long kaba myntoi haduh ïa ka jingkoit jingkhiah.
U la ong ba katkum ka jinglap jong ki stad wad bniah ka long ha u krai ki don lut ki jait vitamin kiba tei ïa ka met u briew. U la ong ruh ba ki don kumba saw haduh san jait ki krai hynrei kiba kham kongsan ki dei u fingers millet bad u fox tail millet. Ha ka ktien Khasi ïa u fingers millet la ju khot u krai hadem.
La ïoh ruh ïa ka jingpynshai na ka Dr.D.Laloo ba ki don kiwei kiwei ki jait jingthung bad ki mar rep kiba dei na ka juh ka thymmei bad u krai. Kitei ki jingthung ruh ki long kiba don kam haduh katta katta ban shna ïa ki jait jingbam ba bun jait. Hadien ka batai ka la don ruh ka jingïaphylliew jingmut bad ka jingpynshai sha ki nongrep da ki stad ophisar kiba la wan khnang.
Kumjuh ruh kum ka dak jong ka jingpynshlur ïa ki nongshong shnong ban pynkhie im biang ïa ka rep krai, la sam ïa ki symbai sha ki nongrep kum ki symbai jong u krai, ki symbai jhur bad kiwei kiwei ki jait jingthung, lyngba ka Dr.D.Laloo bad u Dr A.K.Singh.

Leave A Reply

Your email address will not be published.