Nongpoh, Risaw, 19: Ka Snohktilang Village Organization Umtamur-Umsehkhlieng kaba kdup ïaki 7 tylli ki SHGs ka la ïoh ban plie paidbah noh ïaka ophis treikam ba pura jong ka VO bala plie paidbah ïada da u Bah Mayral Born Syiem MLA ka Nongpoh kum u kongsan ban nang pyntyllun ïaki kam jong ka VO khamtam ban nang ai ka jingshakri sha ki para longkmie.
Ha katei ka sngi la sakhi ruh da ka jingdonlang kong Joyfie Nongrum, CC Incharge ka Umling C&RD Block, ka Kong Flora Makri President VO, Kong Riti Makri Secretary VO, Bah Rophael Makri Rangbah shnong Umtumur, Bah Silvanus Makri Rangbah shnong Umsehkhlieng lem bad kiwei kiwei.
Haba kren ha kane ka jingïalang, u Bah Mayralborn kum u Nongmihkhmat u la ai ka jingïaroh sha ki longkmie jong kane ka shnong ba ki la lah ban pynurlong ïaka jing angnud jong ki ban ioh noh da ka ophis treikam kaba pura bad kyntu ruh ïaki longkmie ha katei ka sngi ba ki dei ban nang ïaitrei shitom shuh shuh bad ban ïa kit ïa bah lang ïaka khia ka shon jong ki Longkmie bad khamtam haki kam shnong kam thaw.
U Bah Mayralborn ha kane ka sngi u la kyntu jur ïaki longkmie ba ki dei ban nang ban wad jingtip shuh shuh naki ophis sorkar bapher bapher kumno ban nang pyntyllun ïaki kam jong ka VO, u la ong ruh ba ngim dei bam shu sngap ïaki ktien jong ki briew kiba ïaleh ban batai stad hynrei ki dei ban da leit wat jingtip hi dalade naki briew kiba kham shemphang, u la bynrap.
