Nongpoh, Risaw 20: Hapdeng ka jingiphuh iphieng ki samla pule jong ka Ri-Bhoi College hapoh ka lama jong ka Ri-Bhoi College Student Union hynnin ka sngi kila pynkut noh ïaka taiew lehkmen jong ki samla ne ka College Week hadien ba ki samla pule katei ka college kila ioh ban shim bynta shitrhem haki jingïakop bapher bapher baroh shitaiew lynter.
Ïa kane ka taïew lehkmen jong ki samla pule ka Ri-Bhoi College la wan ban pynhap pyrda noh da u u Bah Mayralborn Syiem MLA ka Nongpoh Constituency kum u kongsan, haka jingïa don lang u bah S.O Lyngskor Vice President Governing Body kum u symbud kongsan, E. C Benny Principal ka Ri-Bhoi College, Kong W K Blah, Principal Alpha English Hr. Sec. School, Bah R R Makdoh, ki nonghikai ka Ri-Bhoi College, ki samla pule lem bad kiwei kiwei.
Haba kren ha katei ka sngi naka liang u Bah Mayral Born Syiem u la ai mynsiem ïaki Samla pule ba ka por lehkmen ka long kaba kongsan haki Samla kaba dei shibynta ka jingheh jingsan jong ki, hynrei kim dei pat ban klet ïaka lawei ba phyrnai ka shong ruh haki kaba dei tang lyngba ka jingminot bad ka jingtrei shitom ba ki lah ban poi sha ki kliar jong ka nam.
U la ong ruh ba haka jinglong samla ki don shibun ki jingeh ki jingtynjuh, hynrei kum ki samla ki dei ban khlaiñ ka jingmut jingpyrkhat ban nang ban jied ïaki paralok bad khamtam ban im don akor, ban im tip briew tip Blei khamtam ban minot thop haka jingpule kaba ki kmie ki kpa kila angnud ban iohi ïala ki jong ki khun ba kin poi sha ka thong bad ka lawei ba phyrnai, namar ym don jingsngewsarong ïaki kmie ki kpa lait naka akor ka burom bad ka jingtrei shitom ban poi sha ka thong.
La pynwai ruh ïa katei ka College Week jong ka Ri-Bhoi College da ka jingïakop Miss bad Mr Ri-Bhoi College bala shim bynta shitrhem ruh da ki samla pule jong katei ka College naduh ki kynthei bad shynrang bad ha katei ka jingïakop, ka samla Divya Tado kala shah pynkup kum ka Miss Ri-Bhoi College bad u samla Pynsuklang Sohtun kum u Mr Ri-Bhoi College.
