Shillong, Rymphang 11 : U Bah Kansing Lyngshiang uwei u samla rangbah jong ka dong ka thaiñ Mawkynrew ha ka sngi Saitjaiñ jong ka taïew ba dang shu dep, u la plie paidbah ïa ka madan ïalehkai kynjatbol kaba thymmai ha ka shnong Laitmynsang, Mawkynrew C&RD Block, EKHD.
Ïa katei ka madan ïalehkai kynjatbol kaba kot sha ka 5 lak tyngka ba u Bah Kansing Lyngshiang u la pynïoh lyngba ka skhim Chief Minister’s Special Development Fund (CMSDF) jong u snem 2022-23, u la plie ïa u maw nongrim, khap ïa u ribon bad aiti sha ka Laitmynsang Sports and Cultural Club bad sha ka Shnong ba kin pyndonkam ïa ka.
U Bah Kansing Lynshiang haba kren kum u kongsan u la ong ba watla u khlem poi sha ka thong jong ka jingjop ha ka elekshon MLA 2023 hynrei u khlem jah bad khlem iehnoh ha kaban ïarap ia ki paidbah jong ka dong ka thaiñ.
“Nga khlem poi sha ka thong jong ka jingjop ha ka elekshon MLA bad bun lehse kiba ong ba u Bahduh Kansing lada u rem un ym wanphai shuh lane un shu jah noh, hynrei ka kular kaba nga ai sha u paidbah ka long ba la rem la jop kum u trai shnong ngan pyrshang ha la i buit i bor barit ban pyntyllun bad ban ïarap ïa ka jingdonkam jong phi ki paidbah,” ong u Bah Kansing.
U Bah Kansing u la ong ruh, “Ha ka jingïaid lynti kam dei tang ka jingjop kaba wanrah jingkylla, ym dei tang ka jingrem kaban pynduh jingkyrmen, hynrei ka shong hangi iwei la iwei ban pyndonkam hok ïa ka sap ka phong kaba ngi don ban pynïaid shaphrang na ka bynta ka jingbit jingbiang jong ki nong shong shnong.
Ka jingpyrhang barit khlem ki jingkular ngin pynlong ïa ki kum ki mawbynna bad ki mawdong ban ïashan ïa ka imlang ka sahlang ha kane ka dong bad ka thaiñ Mawkynrew baieit jong ngi,” ong u Bah Kansing. U Bah Kansing u la ai khublei sngewnguh kyrpang ruh ïa u Myntri Rangbah ka Jylla U Conrad K Sangma uba la ai sngewbha ïa kane ka madan ha ka Sports Club bad ka shnong ba kin ïoh ban pyndonkam. U la pyntip ruh ba nangne shakhmat kin sa don kiwei pat ki skhim ban sa plie paidbah.
Ha kane ka sngi la ïadonlang u sordar Shnong Laitmynsang u Bah Shot Nongrum, secretary Shnong Bah Noren Suting, ki nongkitkam ka Laitmynsang Sports and Cultural Club, ki riew rangbah, samla haduh ki hep kiba rit.““Ha kane ka sngi la pynlong ruh ka jingpynïalehkai kynjatbol hapdeng ka Laitmynsang Sports Club pyrshah ïa ka Jongksha Sports club.
