Shillong, Rymphang 11: Ka kynhun ïalehkai jong ka Shillong Soccer Scout ka la ïohrah ïa ka namlahduh ha ka lympung phutbol Under-16 Football League 2023-24 ba la pyniaid da ka Shillong Sports Association, bad kane ka la wan hadien ba ka la pynliem ïa ka Merinda FC da 2-1 kol ha ka jingiakhun final hynnin ka sngi Saitjaiñ (10 tarik u Rymphang 2024) ha SSA Stadium, Polo.
Haba phai sha ka jingïalehkai, baroh arliang ki la ïakhun tyngeh naduh kaba sdang ban ïoh pynkhihjar, bad dei ka Shillong Soccer Scout kaba la ïoh ban thep nyngkong lyngba ka kol ba la thep da u Newbirthson Syngkli ha ka 33 minit. Na ka liang jong ka Merinda FC kam shym la kynrandien satia na kane ka jingïakhun bad ha ka 37 minit u Mebankitlang Mawlong u la lah ban pynïakhaid ïa ka jingïalehkai da mar 1 kol.
Hynrei kane ka jingïakhaid kam shym la neh slem, ha kaba ka Shillong Soccer Scout ka la tam biang lyngba ka kol ba la thep da u Prosperwell Ryntong ha ka 48 minit. Kine ki ar kol ki la ïeng skhem haduh kaba kut jong ka por bad lyngba kane ka kynhun Shillong Soccer Scout ka la long syndon ka lahduh ha ka Under-16 Football League 2023-24 jong ka SSA.
Ha kane ka sngi la wan sakhilang da ki kmie ki kpa jong ki khynnah ryngkat ki nongkyrshan, nangta ki dkhot nongkitkam jong ka Shillong Sports Association ryngkat bad u President ka SSA-u Bah Eugeneson Lyngdoh, u ba la sam ïa ka khusnam sha ka lahduh.
Hadien kane ka namjop, ka kynhun Shillong Soccer Scout ka la ïohpdiang ïa ka khusnam ryngkat bad ka song tyngka kaba 15 hajar, katba ka Merinda SC kaba la shahrem ha kane ka final ka la ïohpdiang ïa ka song tyngka kaba 7,500 tyngka.
