Nongstoiñ, Rymphang 11: Ka shlem ai jinghikai ïalehkai football ba thymmai kaba la tip kyrteng kum ka Bright Star Football Academy, ha ka sngi saitjaiñ 10 tarik Rymphang 2024, ka la ïoh ban plie paidbah ïa katei ka shlem ha kaba u bah Srally Rashir sordar ka shnong New Nongstoiñ, u la long u kongsan ha ryngkat ka jingïasynranlang u Dr Lum Mawsor vice president ka MFA kum u symbud kongsan bad kiwei kiwei.
Ha katei ka sngi kum ka dak jong ka jingplie paidbah, u kongsan u la ïoh ban khap ïa u ribbon bad u la ai ruh ka jingïaroh ïa u bah Precioustone Ryntathiang President katei ka Shlem bad ïa ka ïing jong u, namar ka jinglong ba la kloi jong ka ïing ban wan seng ïa kum katei ka shlem kaba lah ban hikai ïa ki khynnah jong ka thaiñ, ba kin kiew ha ka jingïalehkai football kaba long kawei na ki jingkilan met ka ban pyllait ïa ki samla na ki jingmlien ba sniew.
Ïa katei ka jingai jinghikai yn hikai da u bah Abandonmame Lamin AIFF Blue Cubs Leader, AIFF D License Futsal 1 u ba dei uwei na ki Coach ba la pawbha ha ka jylla.
Katei ka shlem ka don ha ka kyntoit Nondeiñ jong ka shnong New Nongstoiñ. Ha katei hi ka jaka kaba don ka madan ai jinghikai, la pynlong ïa katei ka jingïalang plie paidbah bad la pynïaid ïa katei ka jingïalang da u bah Franky Hoojon kum u shongknor.
