Nongstoiñ, K’lyngkot 27: La rakhe ïa ka Republic Day kaba 76 jong ka Ri India ha Nongstoiñ da ka jingshitrhem bad ka jingkmen kaba khraw ha madan St. Peter’s Higher Secondary School, Nongstoiñ. Ïa kane ka jingïalang la pynkup burom da u Symbud Myntri Rangbah ka jylla Meghalaya, u bah Prestone Tynsong ha kaba u la ïoh ban pynher ïa ka Lama lai rong ka Ri India, u la shim ruh ïa ka salute jong ki 14 tylli ki kynhun ba kynthup ïa ki pulit bad ki khynnah skul.
Ki la don haduh 10 tylli ki dur ba itynnad (Tableau), ba la pyni na ki tnad sorkar bapher bapher kiba pyni ïa ki jingthmu bad ki jinglah jong ki. Kane ka jingleh kmen kaba kongsan ka la ai lad ïa ki paidbah jong ka Nongstoiñ bad ki jaka ba marjan ban ïa wan lang bad ban rakhe ïa ka pateng kaba riewspah bad ka kolshor bapher bapher jong ka ri. Ha kane ka jingïalang la ïashim bynta da ki riew pawkhmat, ki heh sorkar, ki samla pule, bad ki paidbah nongshong shnong.
Kiwei pat ki jinglehkmen ha kane ka sngi ki kynthup ïa ka jingsam ïa ki khusnam da u Kongsan sha ki nongjop. Nangta ka la don ruh ka prokram kolshor kaba la pyni ïa ki jingrwai bad ki jingshad. Ha ka jingïakop rwai, ka Nongstoiñ Public School ka la rah ïa ka nam jop, katba ka Mawiong Lumsyntiew Secondary School ka la jop ha ka jingshad. Ka Jawahar Navodaya Vidyalaya ka la jop ïa ka March Pass, napdeng ki kynhun skul kiba la wan ban ïashim bynta ha kane ka sngi.
La pynkut ïa kane ka prokram da ka jingrwai ïa ka State Anthem, ha kaba baroh kiba don ha katei ka jaka ki la ïashim bynta lang.
Ha Mawshynrut, u Bah Gabriel Wahlang MLA Nongstoiñ, u la long u kongsan bad u la ïoh ban pynher ïa ka Lama lai Rong jong ka Ri India, bad shim ruh ïa ka salute na ka bynta ki ar tylli ki kynhun kiba kynthup ïa ka Police Department bad ka skul Christ King Higher Secondary School. Ka tnad Fire and Emergency Services ka la ïoh ban pyni nam ïa ka Tableau jong ki ha kane ka sngi.
