Bthah u DM ban aiti ïa ki suloi ha ki PS &OP- EJHD

Khliehriat, K’Lyngkot 27: U District Magistrate jong ka East Jaiñtia Hills District, u Shivansh Awasthi, IAS ha ka jingpyllait khubor mynta ka sngi u la pynban ïa ki hukum kiba hapoh ki kyndon 163 Bharatiya Nagarik Suraksha Sanhita (BNSS) bad kane ka hukum ka la treikam mardor hapoh ka ditrict na ka bynta ka election MDC sha Jaiñtia Hills Autonomous District Council kum ka Model Code of Conduct.
Katkum ka hukum la ong ba katkum ba la pynbna da ka Didtrict Council Affair Department ba ka long kaba donkam ban shim ki lad jingïada ban pyntikna ba ka jingpynlong ïa ka election MDC kan long kaba iaid beit ha ka suk ka saiñ bad ha ka khuid ka suba hapoh ka district, kumta u District Magistrate u la pybna ba katei ka hukum kan treikam mardor hapoh ka district.
Katkum ka hukum la bthah ïa baroh kito kiba don ïa ki suloi kiba don bad ki license ba kin leit aiti noh shwa ïa ki tiar (suloi) jong ki sha ki police station bad sha kino kino ki Police Outpost kiba don hapoh ka district bad ïa ki suloi yn sa pynphai pat sha ki trai hadien ba la dep kane ka election MDC.
Katkum ka hukum, la mana ban rah ïa ki suloi bad ka hukum kan treikam haduh ban da dep ka election.
Kane ka hukum kan nym treikam ïa ki pulit, ki Security Force, Para Military Force kiba hap ban rah ïa ki tiar kiba long katkum ki kamram jong ki.