Phai khmat ka sorkar pdeng sha ki riew ïaleh laitluid ka thaiñ NE : Conrad

Ban wanrah ïa ka jingsngew ïa jan

0

Shillong, Naiwieng 20 : Wat la ka tnad pule puthi ka phai khmat tang khyndiat eh sha ki khlawait bad ki riew ïaleh laitluid ka ri na kane ka thaiñ shatei lam mihngi ka ri India hynrei ka sorkar pdeng mynta ka la phai khmat bha ban kyntiew bad pynpawnam ïa kine ki khlawait bad riewkhraw ïaleh laitluid ka ri bad kane ka jingleh kan wanrah ka jingïasngewjan bha hapdeng ki paid nongshong shnong jong kane ka thaiñ bad kiba ha kiwei pat ki bynta ka ri India, ong u Myntri Rangbah ka jylla u Conrad K Sangma haba kren ha ka jingïalang Purvottar Swabhiman Utsaw ha nongbah Guwahati mynta ka sngi.
U la ong ba kane ka thaiñ ka la ïaid bad ïa kynduh ïa kiba bun ki jingeh hynrei bunsien ka jop beit ïa ki jingeh bad ka dei ruh kawei na ki thaiñ kaba don ka bynta kaba khraw ban tei ïaka jingïalong kawei jongka ri.
U Myntri Rangbah ula ong “ Ka dang donkam bha ban pynrung ha ka pule puthi ïa kane ka thaiñ bad ki riew khraw jongka khnang ban don ka jingïasngewjan bad jingïasngew long kawei. Nga ai jingmut ruh ba dei ban don ki prokram ba kyrpang halor ka kolshor ïa ki khynnah ha baroh kawei ka ri khnang ba kin ïa ieit bad burom iwei ïa iwei”
U la ïathuh halor ka jingleit jngoh jongu ïa ka Museum ha Israel ha kaba u la ong ba ka sorkar ka la phah ïaki khynnah ba kin leit khnang sha kane ka museum khnang ba kin sngewthuh ïa ka jingeh ba ki Jew ki hap ban ïaid lyngba. “ Ki jingthoh kiba don ha ka museum ki long kiba kongsan bha bad lyngba kane ka la pynlong hi ïaki khynnah ba kin don ka mynsiem ieit ri naduh ba ki dang rit ka rta”, ong u Conrad.
Haba phai sha kane ka thaiñ bad ka spah bah ba la ai da ka mariang, kaba la pynlong ruh ban ïoh ïa ka nam kum ka khyrdop jong ki ri Southeast Asia, u myntri rangbah u la ong kaba donkam tam ka long ban pynïasoh ïa kane ka thaiñ bad kiwei ki ri ba shathie ka khyndew bah Asia da ki surok khyndew bad surok suiñ ruh nalor kata ban don ki prokram ba kyrpang ban pynlong halor ka kolshor jong ki briew kane ka thaiñ bad ki briew jong kiwei ki ri ba shathie ka South East Asia.
“Lada ka sorkar pdeng kan pynkhlaiñ ban pynïasoh ïa kane ka thaiñ bad kiwei ki ri ba marjan wat bad ka ri India hi ruh kan ïarap ban kyntiew shuh shuh ïa ka kam jngohkai pyrthei.
U la ong shuh shuh ba ka jingjan jong kane ka thaiñ sha ki ïew bah jong kiwei ki ri ka long sa kawei ka kabu bah ïa kane ka thaiñ ban wan bei tyngka da ki ri ba marjan bad wat ki nongbei tyngka na ka ri hi ruh. “ Kumta ka long ka long kaba donkam ban shim ïa ki lad ki lynti ban kyntiew ïa kane ka thaiñ kat kum ka Act East Policy jongka sorkar pdeng ba kan kiew sha ki ïew ki hat jong kiwei ki ri kapyrthei” ong u myntri rangbah.
U la ong shuh shuh ba ka long kaba kongsan ruh ïaki briew na kane ka thaiñ kin tip bniah ïa ki briew ne ki nongshong shnong ka ri sha kiwei ki bynta ka ri India ruh. “ Ngi ki briew na kane ka thaiñ ngi dei ban tip shaphang ka kolshor bad ka jingim tynrai jong kiwei ki jaidbynriew kiba shong ba sah ha ka ri ym dei tang ma ki kiba dei ban titp shaphang jong ngi namar dei lyngba ka jingïatip mar kylliang ïa ka kolshor jong kiwei ba ngi lah ban wanrah ïa ka jingïatylli bad jingïalong kawei hapoh ka ri” ong u Conrad.
U la ong lada ki MP na ki jylla bapher bapher ki ïasnoh kti lang bad leit jngoh ïa ki jylla ha kylleng ka ri da kaba ring ruh ïaki video kane shwa kan long kum shijam ban pyni ïa ka jingïalong kawei ha ka ri wat hapdeng ki jingïapher jaidbynriew bad kolshor ruh.
U la kren ruh halor ka saiñ pyrthei da kaba ong lada don ka mon ka don ka lad bad halor kane u la ai ka jingïaroh ïa u myntri rangbah duh ka ri u Narendra Modi uba la bthah ïa baroh ki mynti jongu ba kidei ban leit jngoh na ka por sha ka por ïa ki jylla kane ka thaiñ shatei lam mihngi bad u la ong ba kane ka jingleh ka long kaba donkam bha namar ki myntri sorkar dalade kin ïoh jingtip shaphang kane ka thaiñ bad lyngba kane ruh kin lah ban thaw ïa ki polisi na ka bynta kane ka thaiñ hi baroh kawei.

Leave A Reply

Your email address will not be published.