Shillong, Nailur, 08: U Myntri ka tnat Sam Bording ka Jylla u Abu Taher Mondal ha ka sngi Thohdieng u la ong ba ki mobile company ki dei ban siew noh mardor ïa ka bai thang bording khnang ban lait na ka jingshah ot ka bording ha kano kano ka por.
“Ngi la pyntip sha ki (mobile service providers) ba phi dei ban siew noh ïa ka Bill mardor hynrei lym kumta yn ot noh ïa ka bording. Lada kim lah ban siew ïa ka Bill kaba la sahteng, ngim banse ban shu ot beit ïa ka bording,” ong u Mondal ha ka jingïakren bad ki lad pathai khubor.
U Myntri u la ïathuh ba ka la poi ka jingkyrpad ba thymmai sha ki tyndong skhor jong ka Sorkar na ki nongpynïaid ïa ki mobile company hynrei ïa kine ki kam yn ban ban shong bishar na ka por sha ka por.
Haba kylli, u Mondal u la ong, ka tnat Sam Bording ïa mynta ka la shimkhia bha ban peit ba kan ym don ka jingthud ha ka Mobile Network ha ka jylla.
“Yn sa leh da kaba tyngeh hynrei ha ka khep ba ngi la ot ïa ka bording sha baroh ki Tower, phin sa ïohi kaei ka ban jia namar ka ban thud ka dei ka Network namarkata ngi hap ban bishar na baroh ar liang da kaba pynshong nongrim ba ngi hap pan ruh ïa ka bai thang bording bad ha kajuh ka por ngi hap ban kiar kaba lah ban ot ïa ka bording na ki Mobile Tower khnang ban weng ïa ka jingthud ka Network,” la ong shuh shuh u Mondal.
“Ki don katto katne ki Company ki bym siew bad kiba shu phet noh, namarkata, ngi la hap ban pyrkhing bha ba kum kine ki Mobile Tower namarba ki paidbah ki pynbor ïa ngi ban ai jingbit ïa ki Mobile Tower ba thymmai khnang ba ka Network kan ym thud. Namarkata, ngi la hap pynbor ruh ïa ki ban siew ïa ka Bill bad ki don katto katne ki Bill ba ladep siew ruh,” u la bynrap.
