Shillong, Nailur, 08: Ka ophis District Tuberculosis Officer, East Khasi Hills District ha ka sngi Thohdieng ka la pynbna ïa paidbah ka Ni-Kshay Mitra Project ha East Khasi Hills District kaba dei ka prokram sam jingbam teimet sha ki nongpang TB ba la ai jingkyrshan da ka kynhun Doctors For You ha ka jingïalang kaba la long ha Reid Provincial Chest Hospital Hall, Shillong da ka jingsakhi lang jong ka Deputy Commissioner ka East Khasi Hills District ka Kong R. M Kurbah kaba la long kum ka kongsan.
Ka kynhun Doctors For You ka dei ka kynhun trei mon sngewbha kaba ai jingkyrshan ïa ki 100 ngut ki nongpang TB na East Khasi Hills District da ki jingbam teimet ïa kiba la ai jingïarap da ka MYLAN Pharmaceuticals Pvt. Ltd, Bangalore.
Kum ban shu kdew hangne, ïa ka NI-KSHAY MITRA la pyllait paidbah da ka President ka ri India hapoh ka Pradhan Mantri TB Mukth Bharat Abhiyan ha ka 9 tarik, Nailur, 2022. Lyngba ka NI-KSHAY MITRA la buh thong ban ai jingkyrshan ïa ki nongpang da ki jingbam teimet, ka jingkyrshan ha kaba ai ïa ki jinghikai bad ka jingsumar.
Ka jingwanrah ïa kane ka prokem ka long kum shi bynta ka jingïakhun jong ka ri India ban pynurlong ïa ka “Pradhan Mantri TB Mukth Abhiyaan”, kaba thmu ban pynduna ïa ka jingdon jong ki nongpang TB hapoh ka ri India shwa u snem 2025. Lyngba kane ka prokram la ai jingkyrshan ruh ïa ki nongpang TB ba kin pdiang ïa ki lad jingïarap lyngba ka Corporate Social Responsibility khnang ban ïoh ïa ka jingsumar haduh ban da koit, ban ïoh ïa ka jingïatreilang ha ki shnong ki thaw bad ban pynurlong ïa ka thong ban rat dyngkhong ruh ïa ka jingpang TB.
Ka jingai jingkyrshan ïa ki nongpang hapoh kane ka thong ka long ban ai jingsumar ei, ban ai dawai ei.
Ka Kong R.M. Kurbah haba kren ha kane ka sngi, ka la ai khublei ïa ka kynhun Doctors For You kaba la shim ïa kane ka sienjam ban kyrshan jingïarap ïa ki nongpang hapoh ka distrik bad pynpaw ruh ba kane ka projek kan pynurlong ïa ka thong ban rat dyngkhong ïa ka jingpang.
Ka la kyntu ïa ki nongpang kiba don ha kane ka sngi, ba kin dih tista ïa ki dawai dashin bad ban bam ïa ki jingbam tei met khnang ba kin ïoh biang ïa ka met kaba koit ba khiah.
U State Tuberculosis Officer u Dr M. Mawrie u la aiti ruh ïa ka Ni-kshay Mitra Certificate sha ka Kong R M Kurbah.
