Nongstoiñ, Nailur 8: Ha ka sien ba nyngkong eh ba ki khynnah skul kiba pule ha ka Class X & XII ha ki skul kiba dei napoh ka Nongstoiñ Constituency, kiba wan shakhmat ha ka Final Exam jong ka Secondary School Leaving Certificate (SSLC) bad ka Higher Secondary School Leaving Certificate (HSSLC) jong u snem 2020-23 kaba la pynlong da ka Meghalaya Board of School Education, ki la shah pynkup burom ryngkat ka khusnam kaba la ai lyngba ka MLA Academic Excellence Award.
Ïa ka jingpynkup burom la pynlong ha ka sngi thohdieng ha Bishop hall New Nongstoiñ, ha kaba u bah Gabriel Wahlang MLA ka Nongstoiñ, u la long u kongsan bad u bah Garod L.S.N Dykes Deputy Commissioner ka West Khasi Hills, u la shah khot kum u symbud kongsan. La ïadon lang ruh da u bah Bikram Marak Superintendent of Police West Khasi Hills, ki Principal jong ki skul ki kmie ki kpa jong ki khynnah kiba shah pynkup burom bad kiwei pat ki khynnah skul.
La pynïaid ïa ka jingïalang pynkup burom da u bah Ronald Syiem bad la ïoh ïa ka jingkren na u bah Bikram Marak, u bah Garod L.S.N Dykes bad khatduh eh la ïoh ïa ka jingkren na u bah Gabriel Wahlang uba long ruh u kongsan ha katei ka sngi.U bah Garod L.S.N Dykes kum u symbud kongsan haba ai jingkren, u la ong ba ki don lai tylli ki bynta kiba baroh ki khynnah skul ki dei ban don bad kita ki long ka nongrim ha ka jingpule ka jong ki, ka jingmut jingpyrkhat kaba bha bad ka thong na ka bynta ka lawei jong ki.
U la ong ruh ba ki khynnah skul kiba don ïa ka nongrim kaba skhem ki dei ki khynnah kiba kham poi shakhmat eh ha ki Exam bapher bapher la ka long ha ki secondary school ne ki higher secondary school. U la ong ruh ba na ka nongrim kaba skhem kaba ki don, ki dei ruh ban don ïa ka jingmut jingpyrkhat kaba bha bad kaba beit, namar lada naduh na skul ki khynnah ki don ïa ka jingmut jingpyrkhat ka bym beit bad kaba sniew, kin ym poi sha ka thong jong ka jingpule ka jong ki.
Nalor kata u la ong ruh ba ha ka jingpule, ki khynnah ki dei ban don ïa ka thong na ka bynta ka lawei ka jong ki, namar ka thong ha ka jingpule ka long ban kiew ha ki kyrdan kiba halor, na ka bynta ban shakri ha ka imlang sahlang bad lada kim don ka thong ka jingule kan shu sepei khlem jingmyntoi.
U bah Gabriel Wahlang haba ai jingkren kum u kongsan u la ong ba ka thaiñ Nongstoiñ kam pat don ki samla kiba poi ha ka kyrdan IAS, MCS, IPS, IFS bad kiwei kiwei ki kyrdan kiba ha jrong. Kumta, ki khynnah skul ha kine ki sngi ki la dei ban don ïa ka thong ban leit pule bad ban pypoi shaduh kitei ki kyrdan na ka bynta ka burom jong ka thaiñ bad ka district hi baroh kawei.
Nalor kata u la ong ruh ba ki khynnah haba ki don ha ki jing pule ki dei ban don ka jingngeit bad shanniah halor lade da kaba trei shitom bad minot thop ha ka jingpule bad kim dei ban buh ïa ka jingeh hakhmat bad ban ong ngam lah namar ki nonghikai bad ki kmie ki kpa ruh ki ngei bad shanniah ha ka jinglah jong ki khynnah lyngba kla jingtrei shitom ban ka jingminot.
Kaba kham sngew tynnad ka long ba utei u nongmihkhmat u la pynsngew ba kum ka jingpynshlur ïa ki khynnah, nangne shakhmat la pynkhreh ban ai khusnam sha kito ki khynnah pule ha ka Class X, XII, B.A. B.com bad ki Gold Medalist ha ka MA/Msc lane ha kino kino ki Post Graduate.
Nalor kiba poi ha kitei ki kyrdan, la pynkhreh ruh ban ai khusnam arphew hajar na ka bynta kito ki samla pule kiba pass ïa ka Preliminary exam ha ka MCS /MPS, na ka bynta ban kin kyrshan ha kaba leit bteng ban pule.
Nangta yn ai jingïarap ruh sha kito ki samla kiba shah jied ban leit ïashimbynta ha kino kino ki jingïalehkai haduh ka State level bad National Level bad bun kiwei kiwei.
Ha kane ka sngi la sam ïa ki khusnam sha ki laiphew ar ngut ki khynnah kiba wan shakhmat ha ki Exam Class X bad XII jong u snem 2020-23 ba kynthup ruh ïa ki saw ngut kiba poi sha ka Top Twenty.
