K a jingkyntur pud ka Jylla Assam lyngba ka Karbi Anglong Autonomous Council (KAAC) shapoh u pud u sam jong ka shnong Mukroh da kaba tih surok ka la pynshaïong hi ngaiñ ïa ki nongshong shnong jong ka shnong Mukroh, ka shnong kaba don shapoh u pud u sam ka Jylla Meghalaya.
Watla ki nongshong shnong ka shnong Mukroh ki la ju ïai pynpaw ba shnong Mukroh kam hap satia ha ka jaka ba don ka jingïakajia pud hynrei ka Sorkar Meghalaya kam shimkhia ïa kane ka jingeh jong ki nongshong shnong kat haduh ka Assam ka nud ban leh trai da kaba buh syndon ïa ka Forest Beat Office ha ka khlaw shnong jong ka shnong Mukroh, ka shnong kaba hap hapoh ka West Jaiñtia Hills District.
Kane ka jingpynibor jong ka Jylla Assam ka la wan jia ha kum kane ka por ba ka Sorkar Meghalaya bad ka Sorkar Assam ki la ïamynjur ban ïapynbeit noh ïa u pud u sam uba la kyllaiñ sohkyrdot la 50 snem kynthih bad uba la wanrah ïa ka jingïapher jingmut hapdeng ki paidbah kiba sah ha khappud jong ki shnong ka jylla Meghalaya bad Assam.
Ki paidbah ki dang kynmaw kyndiang ïa ka jingshah dkhat jubor ka jingim jong ki hynriew ngut ki briew ki la shah siat ïap ha ka 22 tarik Naiwieng, 2022 ha ki Pulit pahara khlaw jong ka Assam Forest Protection Force ha ka shnong Mukroh. Ha kane ka jingjia, uwei Forest Guard u la ïap bad arngut kiwei pat ki la mynsaw. Ki lanot kiba la duh ei ïa la ka jong ka jingim haduh mynta kim pat ïoh satia ïa ka hok namarba kane ka kam mynta ka dang don ha ka jingtohkit jong ka Central Bureau of Investigation (CBI).
Kane kajingjia ka la long kum ka sohkhliang kaba dang sah dak ha ka jingmut jingpyrkhat jong ki nongshong shnong ka shnong Mukroh namar katkum ka jingïathuh jong ki nongïalam ka shnong Mukroh kiba la ujor sha ka Sorkar ïa ka jingtih surok ka KAAC, ki paidbah nongshong shnong ka shnong Mukroh ki im hapdeng ka jingshong syier mynsiem namar ka jingshah pyrkhing ha ka KAAC ban ot wat ïa u phlang bad ïa ki dieng napoh ka khlaw jong ka shnong.
Ka jingkylli kaba mih mynta ka long, hato ka Sorkar Meghalaya kan pyrshah neem ïa kane ka jingkam trai jong ka Sorkar Assam ïa ka shnong Mukroh kaba la kyntur pud haduh 8 kilomitar shapoh ka shnong Mukroh. Kane ka jingkyntur pud jong ka Assam ka la pynkylla ïa ka shnong Mukroh kum ka shnong kaba don mynta ha ka jingïakajia pud.
Ka shong sa tang ha u Chairman jong ka Regional Committee ban pynshisha ïa ka jinglong trai jong ka Jylla Meghalaya ka shnong Mukroh da kaba pynshong nongrim katkum ki dulir pynskhem khyndew na ka Jaiñtia Hills Autonomous District Council (JHADC). Lada bakla bad pher wiak ka shnong Mukroh khlempep kan shah klun ei khamakha ha ka jylla Assam.
Hapdeng kine ki jingïaksaid jong ki paidbah ka shnong Mukroh hynrei kumba ka paw pyrthei, i kumba ka Sorkar Meghalaya ka shim sting namarba la shu phah tang da ka ktien ïa ki Magistrate bad ïa ki Ophisar Pulit ban shu leit pynsangeh ïa ka jingkyntur pud bad tih surok beaiñ da ka KAAC katba ka kam pat kam paw eiei namarba ka Assam kam kheiñ wat tang khyndiat ruh.
Ka jingeh jong ka Elaka Labang Nongphyllut kaba hap hapoh ka thaiñ Block-I, ka jingeh jong ka shnong Psiar bad Khanduli ki dei kiba jyrwit jyrwat haduh katta katta ba ka Sorkar Meghalaya kan hap ban pynksan ïa ka jinglong trai da ki dulir namarba ka Sorkar Assam khlem pep kan kdew beit da ka map bad ka dulir kaba don lypa naduh shwa ban phiah ha ka jylla Meghalaya ha u snem 1971 na ka jylla Assam.
Ka Elaka Labang Nongphyllut ka dei kaba kynthup ïa kiba bun ki shnong Khasi ïa kaba la dkhat jubor da ka Assam ha u snem 1951 bad ka jingbym ïasoi ïa ki dulir ha u snem 1957, ka la pynlong ïa ka Labang Nongphyllut ban ïai don ha ka kti jong ka Assam haduh mynne mynta bad ka jingïakhun jong ki khun ki hajar ka Elaka Labang Nongphyllut ban lait na ka Assam ka la kot mynta sha ka 73 snem.
