Shillong, Nohprah 04: Ka komiti jied player (Junior men Selection Committee) jong ka Meghalaya Cricket Association ka la jied ïa15 ngut ki rang ïalehkai na ka bynta ka jingïakhun ba khatduh jong ka kynhun ha ka U-19 men’s Cooch Behar Trophy 2024-25, ka ban long pyrshah ïa ka Karnataka naduh ka 06 tarik haduh ka 09 tarik u Nohprah ha Bangalore.
Ka komiti jied player ka la wanrah jingkylla tang ïa u wei na bynta katei ka jingïalehkai, ha kaba ïa u Shubham Rasaily la kynthup noh ha ka standby bad la wanrah pat ïa u Rohit Sharma ha ka kynhun ïalehkai.
Watla ka la shah rem ha baroh saw tylli ki jingïalehkai ba la ïakhun haduh mynta ha ka Elite Group A, hynrei ka Meghalaya ka la pyni dak ïa ka jingnang kiew shaphrang, khamtam ha ka liang ka tied (Batting) ha ki ar tylli ki jingïalehkai ba la dep jong ka, kiba la long ha la ïing pyrshah ïa ki kynhun ba pawkhmat bad kiba khlaiñbor, ka Baroda bad ka Delhi.
Ha kawei pat ka liang, ka Karnataka, ki la mad ïa ka samoi ïalehkai kaba marïabiang ha kaba ki la jop arsien bad rem arsien hynrei mynta kin ïalehkai ha la ïing bad ka Meghalaya kan hap ban ïakhun shitom ban kiew shaphrang.
Ka kynhun ïalehkai jong ka Meghalaya pyrshah ïa ka Karnataka: Manthan Dey, Dipankar Baruah (C) (WK), Heiyomiki Ryngkhlem, Dipayan Nandi, Gaurav Jyoti Thakuria, Ashish Kumar Lohar, Gaurav Narleng, Apandanka R Marak, Kshitij Singhania, Rudrasingh Rathore, Sachang Sangma (VC), Shavian Blah, Grish Raj Ray, Angkit Tamang, Rohit Sharma. Standby: Shubham Rasaily, Pushkar Raj Singh, Changsrang S Marak
Support staff: Sandipan Deb Nath (Head Coach), Hemant Roy (Assistant Coach), Hamboy Langbang (Physio), Gregory Syiemlieh (Trainer), Aaron G Diengdoh (Manager).
