Markhmat bad ki paidbah ka Nongstoiñ Block Development Office kular u CM ban wanrah kam pynroi

Nongstoiñ, Nohprah 03: U Myntri Rangbah ka jylla u Conrad K Sangma ha ka sngi ba ar u la kular ban shimkhia halor ki jingeh ba ki nongïalam shnong ki la pynsngew lyngba ka prokram CM Connect kaba la long ha Nongstoiñ, West Khasi Hills.
Ha kane ka prokram la wan ban ïashimbynta da ki khlieh nongsynshar shnong na ki shnong bapher bapher, kiba hap hapoh jong ka Nongstoiñ Block Development Office ha ryngkat ka jingdonlang ki heh ophisar sorkar na ki tnad bapher bapher.
Ki nongïalam shnong ki la ïoh ïa ka lad ban ïakren bad u Myntri Rangbah, ban pynpaw ïa ki mat bad ki jingdonkam ka shnong ka jong ki. Ki la kyrpad ïa u Myntri Rangbah ba yn tuklar lem ïa ki mat kiba la pynsngew kiba ki kynthup ïa ka jingbhah tyngka ban shna ïa ki surok, jingkieng, Health Center, ki kam pynroi na ka bynta ka kam jngohkai, ki kam pynroi ha ka liang ka kam ïalehkai, ka jingdonkam ïa ki Bank bad ban kyntiew ïa ki prokram bad ki skhim, ban kyntiew ïa ki skul bad ki jaka ai jingsumar ïa ki mrad bad kiwei kiwei.
U Myntri Rangbah u la shah shkor bha ruh ïa ki jingpynsngew jong ki nongïalam shnong bad u la bthah ruh ïa ki khlieh jong ki tnad sorkar ban shimkhia mardor halor kitei ki mat.
Ha kaba ïadei bad ka koit ka khiah, u Myntri Rangbah u la ong ba ka sorkar ka dang ïaleh ban kyntiew ïa ki jaka ai jingsumar kiba la don lypa khnang ba kin lah ban ai jingshakri kham bha shuh shuh. U la ong ruh ba ka sorkar kan pynbiang ïa ki Grant na ka bynta ki seng trei mon sngewbha ban kyntiew shuh shuh ïa ki jingtei bad jingdonkam kiba la don lypa ha ki jaka ai jingsumar. U la pynbna ba ka sorkar kan ïaleh noh mardor, ban kyntiew noh ïa ka Nongstoiñ Civil Hospital.
U la pyntip ba ka sorkar ka la bei tyngka palat ïa ka T.1000 klur na ka bynta ban kyntiew ïa ka jingtei ha ki kam ïalehkai ha kylleng ka jylla Meghalaya bad u la pynthikna ba ka sorkar kan trei ryngkat lang bad ki shnong ki thaw ban tei ïa ki jaka ïalehkai ha ki thaiñ nongkyndong.
Ha kaba ïadei bad ka jingkyrpad ban pynduna ïa ka ram na ka bynta ki SHG, u Myntri Rangbah u la ai ka jingkular ba un shimkhia ïa katei ka kam bad ka Myntri ka Sorkar pdeng kaba khmih ïa ka pla tyngka.
U Myntri Rangbah u la ong ba ka CM Connect ka dei ka kabu ïa ka sorkar ban sngap bad shah shkor bad ban pynbeit ïa ki jingeh jong ki paidbah. U la pynshlur ïa ki MLA, ki khlieh jong ki tnad Sorkar ban pynïasoh bad ki paidbah ha ka kyrdan ka jong ki.
Ka CM Connect kaba la pynlong ha Nongstoiñ ka dei ka 5 kaba la pynlong ha ka jylla bad u Myntri Rangbah u la ong ba un bteng ban ïaleh ban pynïajan ïa ka jingai jingshakri ka sorkar sha ki paidbah ka jylla.