Shillong, Nohprah 03: U State president jong ka All India Trinamool Congress (AITC) u Bah Charles Pyngrope ha ka sngi baar u la ong ba u dang pyrkhat la un pynïasoh bad kiwei pat ki seng saiñ pyrthei da kaba ban jur ruh ba ka seng Congress ha Meghalaya ka donkam ïa u captain ba bha bad ba tbit.
Lah ban ong ba u Bah Pyngrope u la shah iehnoh marwei kum u MLA ka Nongthymmai Assembly constituency naba ki nongïalam jong u ki la leit phai biang sha ka Indian National Congress.
“Baroh ki la iehnoh ïa nga, kaei kaba nga dei ban leh, ngam lah ban pynsangeh ïa ki,” ong u MLA ka Nongthymmai bad uba long ruh u Lamphang barim ka Assembly haba kren shaphang kane ka jinglong jingman hapoh ka constituency jong u.
Halor ki hamsaïa ba u lah ban pynïasoh biang sha ka seng Congress, u Bah Pyngrope u la ong, “Ha kane ka khyllipmat ngam pat shym la pyrkhat ïa kane ka kam naba nga dang dei hi u president jong ka TMC.”
U la bynrap, “Kumba long mynta nga dang sah hi marwei. Nga dang dei u samurai ba khatduh uba dangïeng haduh mynta.”
Halor kane na ka liang u MLA ka Nongthymmai u la ïathuh ba um pat shym la ïoh ïa kano kano ka jingïakren kaba wan na ka seng Congress ha kaba ïadei bad kane ka kam.
“Ïa nga ym pat don satia kiba la wan ban ïakren la ka dei na ka seng Congress, NPP, VPP ne BJP. Ym pat shym la don kiba wan ban kynduh ïa nga,” u la ong.
Ha kawei pat ka liang u Bah Pyngrope u la ong ba ka Congress ha Meghalaya kam pat dei satia ka lieng kaba la ngam, hynrei ka donkam ïa u captain uba tbit.
“Naduh ka snem 2022, nga la ong ba ka Congress ka dei ban don ka jingïatreilang. Naba ki la don kiba kylli ïa nga hato ka Congress kadei ka lieng kaba la ngam, hynrei nga ong ïa ki ba kane ka lieng kan ym ngam satia, hynrei ka donkam ïa u captain ba tbit, uba lah ban niah ïa ka lieng.”
Haba kylli la ka dei ka por ban wengnoh ïa u nongïalam ka Congress u Bah Vincent H Pala, u MLA ka Nongthymmai u la ong, “Nga dei u ei ban bishar naba ka seng ka la don la ka jong ka riti pynïaid kam ba dei ban bud. Nga la don ha kane ka seng la kumba 30 snem. Ha ka jingshisha nga la don shabar ka party tang mynta shisnem shiteng haduh mynta.”
Na ka liang jong u ula pynkynmaw, “Ki rukom pynïaid kam hapoh ka riti synshar jong ka Indian National Congress ka long kaba shai ba manla ki block, kaba mut manla ki constituency, kidei ban don u ne ka president bad ka kynhun, kiba jied ïa ki dkhot, kiba rung hapoh ka Congress na kine ki block, kaba mut ba baroh ki 60 ngut ki dei ban bud ïa kine ki rukom treikam.”
“Shisien ba la bud ïa kine ki kyndon treikam uno uno uba la shah jied kum u president jong ka jylla, u la dei ban long uba biang ban bishar ïa uno uno u briew na baroh ki liang. Hynrei kumba ka long mynta ka la shim por bha ïa ka Congress ba kam shym la bud ïa ki kyndon jong ka jingïajied nongïalam ne president. Ïa nga la jied kum u treasurer jong ka Congress, ym da kaba thep vote. Ha ka por jong nga la jied ïa u Late OL Nongtdu kum u president. Lada ïa kane ka rukom pynïaid kam la pynbud biang baroh ki kam kin sa ïaid beit biang,” u la ong da kaba bynrap, “Ka Congress kadei ka party, bad ka dei ka seng kaba la rim tam hynrei ngin ym lah ban shu im sah hapoh ki jingjop jong ka marwei. Ngi hap ban ïaid katkum ka por da kaba bud ruh ïa ki kyndon jong ka. Lada la bud ïa ki kyndon yn ym don kiba ujor halor ki rukom treikam jong ka seng.”
Haba kylli la u la long uba kloi ban ïatreilang bad u Bah Pala, u la ong, “Ngam shym la don kano kano ka jingeh. Nga tharai ba kan bha ïa u ban don hapoh ban ïa kaba u don shabar. Nga long uba la khreh ban ïatreilang bad no bad no. Nga dei u ei? Nga dei tang u dkhot. Naba lada nga rung hapoh ngan long beit tang u dkhot.”
Haba pynkynmaw ba u Bah Pala u dei u paralok ba ïajan bad u u la ong, “Nga la ïajan bad u naduh ka por ba u la long u president. Ngi dang long ki paralok kiba ïajan bha, nga mut ban ong ba nga la kham rim ban ïa u ha ka rta hynrei ngi dang long shi paralok.”
Na ka liang jong u, u la ong ba kam shym la don kano kano ka jingujor pyrshah ïa ki nongïalam jong ka AITC naba ka don barabor ka jingïatreilang bad ki.
“Haba nga leit sha Kolkata, nga donkam ban ïakren bad ki ha kaba ïadei bad ki kam bad ka jingkhang barabor ka plie na ka bynta jong nga,” u la ong.
Ha kajuh ka por na ka liang u State President ka AITC u la kyntait halor ki jingkynnoh ba ka don ka jingïapher jingmut hapdeng jong u bad u Myntri Rangbah barim ka jylla u Mukul Sangma.
