Bthah ka ïingbishar ban pynpoi ïa ki jingtip ba bniah halor ka jingshah kynnoh u Bah Iangrai

Shillong, Nohprah 03: Ka Meghalaya High Court ka la bthah ban pynpoi ïa ki jingtip kiba bniah na ki tnat sorkar ha kaba ïadei bad ki jingshah kynnoh ïa u heh ophisar ka tnat u pulit u GK Iangrai ba la kynnoh ba u la donkti ha ki kam bamsap ba kadei ban pynkut noh ha ka 31 tarik u Lber, u snem ban wan.
Haba pynmih ïa ka jingbishar ha ka sngi Nyngkong, ka meij kaba kynthup ïa u Chief Justice IP Mukerji bad u Justice W Diengdoh ka la ong, “Ka Ïingbishar ka la khmih ïa kane ka jingkynnoh bad ïohi ba ki bor ba dei peit kim shym la lah ban leh eiei ha kaba ïadei bad ka jingshim kam ha kaba ïadei bad kane ka jingshah kynnoh.”
Na ka liang ka Ïingbishar kam banse ban tuklar naba ka por ka la ïaid la kumba 2 snem halor kane ka sienjam kumba la kwah da ka Court bad ba la shim khia da ma ka bad kumta kane ka kam ym don kam shuh ban bteng da ka Court.
Ha ka jingai jingmut jong ka ïingbishar ka la ong, “Ngi la buh ka jaka na ka bynta kane ka PIL da kaba bthah ban wanrah ïa ki jingtreikam jong ki tnat kaba dei ban pynpoi hapoh ka 31 tarik u bnai Lber, 2025. Ngi bthah ruh ba ïa ki mukotduma kam runar ba dei ban wanrah hapoh ka por ba la buh.”
Lah ban pynkynmaw ba ïa u Bah Iangrai la kynnoh ba u la donkti ha kaba thied ïa ki 29 tylli ki kali jong ka tnat pulit, bad ba la kynnoh ba u la buh hapoh ka jingpeit jong u bad u la pyndonkam bakla ha ka por ba u la long kum u Assistant Inspector General of Police (AIGP).
Ka ïingbishar ka la pynmih ïa ka hukum hadien ba la pyntip da Advocate General ha kaba na ka 43 ngut kiba la sakhi na ka bynta kane ka kam hapoh ka departmental enquiry, 41 tylli la dep ban khmih bniah bad kumba 2 tylli ym lah ban ïoh. Kumta halor kane ïa ka jingkhmih bniah halor kiba la sakhi la dep ban pyndep.
“Ïa ngi ruh la pyntip ba ïa ka charge-sheet halor ki criminal case la dep ban buh pyrshah ïa une u ophisar. Ïa u la kem bad mynta u don ka lad ban ïoh ïa ka jamin. Ngi la shim ïa kine baroh ki jingshisha bad ngi don ka jingmut ba kane ka PIL la dep ban shimkhia,” ong ka meij ki nongbishar.