Ngi kyntaid ïa ka Industrial Estate ha Byrnihat, pyntreikam noh mardor ïa ka Solid Waste Management: RBPC

Nongpoh, Nohprah 03: Ka Ri-Bhoi People’s Council (RBPC) Seng Kmie ha ka sngi Baar ki la aiti da ka jingthoh ha u Deputy Commissioner ka Ri-Bhoi District ban shimkhia na ka bynta ban pyntreikam noh mardor ïa ka jaka bret ñiut kaba don ha ka shnong Umshangling, Ri-Bhoi District,
Ka RBPC hapoh ka jingïalam jong u samla Jayson Lennox Nongrum ha ka jingdonlang u samla Vincent Sohkhwai, u Samla Mission Tron President ka Nongpoh Circle, Samla Ïohkmen Lapang President lem bad ki dkhot kim shym la ïoh ban ïakynduh ïa u DC namarba u dang don ha ka shuti, hynrei ki nongïalam ka seng ki la ïoh ban ïakynduh noh ïa ka kong B Pakynteiñ ADC ka Ri-Bhoi ban kyntu ïa ka sorkar ba kan pyntreikam noh ïa katei ka Solid Waste Management ka bym shym la treikam mynta la bun snem wat hadien bala dep ban plie paidbah ïa ka da u Myntri Rangbah ka jylla ha u snem 2019 bad kumjuh ruh ban pynpaw ka jingpyrshah ïa ka jingthmu ban wanrah Industrial Estate ha ka thaiñ Byrnihat kaba dei ka jaka kaba la jaboh lypa bad wat sha ka thaiñ jong ka Hima Jirang kumba la ai jingmut da u MLA hadien ka jingpyrshah jong ki paidbah ha Byrnihat.
Haba kren sha ki lad pathai khubor u Samla Jayson Lennox Nongrum u la ong ba kum ka seng ka dap da ka jingsngewkhia kaba jur halor ka jingbym lah ka sorkar ban pyntreikam noh ïa ka solid waste management ha ka shnong Umlyngkdait kaba la wanrah jingeh kaba khraw ïa ki paidbah nongshong shnong naka jingsma kaba mih ha katei ka jaka bad ka jingbret pathar ïa ki jaboh jabaiñ bad dei halor katei ka nongrim kum ka seng ka kwah ban pynkynmaw biang sha ka sorkar ba kan pyntreikam noh mardor ïa katei ka jaka bret ñiut da kaba buh jingthoh sha u DC, hynrei katei ka jingkynduh bad ka kong B Pakynteiñ kam shym la ai jinghun satia ïa ki nongïalam namar kim ïoh ban ïakren bha bad ka jubab kaba hun halor katei ka jingthoh kaba ki la buh.
Ha ka juh ka sngi ki nongïalam ka seng ki la pynpaw ruh ka jingpyrshah kaba jur halor ka jingthmu jong ka sorkar ban wanrah ïa ka Industrial Estate ha ka thaiñ Byrnihat kumba ki paidbah ki la mih ban pyrshah naka liang ka seng ruh kan pyrshah ïa katei ka jingthmu haduh ba kut namar kumba la tip paidbah ba ka Byrnihat ka la dei kawei naki thaiñ ba pawnam ha ka ri India halor ka jingjaboh bad lada wanrah sa katei ka nongbah ki karkhana ym tip shuh kaei pat ka ban jia ïa ki paidbah kiba im bad ring mynsiem ha katei ka jaka.
Ka seng ka la pynpaw ruh ka jingpyrshah hadien ka jingai jingmut jong u MLA ka Jirang ban rah noh sha ka thaiñ Hima Jirang, ban pynjaboh sa sha katei ka jaka ba kum ka sorkar kam dei ban ïapeiñ ïa ka ïoh ka koit ka jylla bad ka koit ka khiah jong ki paidbah.