Shillong, Nohprah, 03: Ki nongïalam shnong jong ka shnong Mukroh, West Jaiñtia Hills District ha ka sngi Baar ki la ujor sha u Symbud Myntri Rangbah ka Jylla uba khmih ïa ka tnat Pohiing u Bah Prestone Tynsong halor ka jingkyntur pud jong ka Karbi Anglong Autonomous Council (KAAC) shapoh u pud u sam jong ka shnong Mukroh da kaba tih surok.
Ha ka jingïakren bad ki lad pathai khubor, u Secretary jong ka shnong Mukroh u Precioustar Sten ba la synran lang da u Chairman u Bah Chilangki Phawa bad u Waheh Shnong u Bah Kitlang Maskut, u la ïathuh ba ïa ka jingujor la aiti ruh sha u Chairman jong ka Regional Committee na ka bynta ka Jaiñtia Hills u Bah Sniawbhalang Dhar uba long ruh u Symbud Myntri Rangbah ka Jylla.
U la ong ba u Symbud Myntri Rangbah ka tnat Kam Pohing u la kular ban sa bthah ïa u Superintendent of Police ka West Jaiñtia Hills ban shimkhia halor kane bad u Chairman ka Regional Committee na ka bynta ka Jaiñtia Hills ula pyntip ba un shong jingïalang bad u Chief Secretary ka Jylla ban pyrkhat halor kane ka jingïoh jingujor.
U Secretary Shnong ka Mukroh u la ong, katkum ka jingtip ba la ïohlum, ka KAAC ka la thmu ban shna ïa ka kper rep slasha hynrei katba ha ka jingshisha ka don da kawei pat ka jingmut kaba shalyndet.
U Secretary Shnong ka Shnong Mukroh u la ïathuh ruh katkum ka Jingpynbna (notification) kaba 25 tarik, Risaw, 1968 ba la pynmih da ka ophis jong ka Jaiñtia Hills Autonomous District Council (JHADC), u pud u sam jong ka shnong Mukroh u kot haduh ka Elaka Labang Nongphyllut/Block-I ne ha ka shnong Moikoilum. Hynrei ka Sorkar Assam ka la kyntur sha ka shnong Mukroh naduh ki snem kiba mynshwa bad pynskhem ruh ïa ka jingkam trai da kaba buh ïa ka Forest Beat House hapoh ka shnong Mukroh.
“Ha u bnai Nailur, 2024, ka KAAC ka la pynkhyllem ïa ki dieng ban shna surok ha Salang, Mukroh da ka jingthmu ban shna ïa ka kper rep slasha bad kum ka Dorbar Shnong ngi pyrshah jur ïa kane ka jingkyntur pud ka KAAC sha u pud u sam jong ka shnong Mukroh kaba dang hap hapoh ka JHADC, Laskeiñ C&RD Block, West Jaiñtia Hills, Meghalaya,” la bynrap u Bah Sten.
Haba kylli, u la ïathuh ba ka jingkyntur pud jong ka Sorkar Assam ka long haduh 8 kilomitar shapoh ka shnong Mukroh.
Mynta naduh ba ka KAAC ka la tih surok da ka jingsynran lang jong ki Pulit ka Sorkar Assam la khang wat ïa ki trai shnong Mukroh ban thoh dieng, ban ot phlang na ka khlaw jong ka shnong kaba la don naduh hyndai hynthai.
“Ïa mynta ki nongshong shnong ki sheptieng ban leit wad dieng thang bad ban thoh dieng na khlaw bad ban leit rep sha lyngkha na ka jingshah pyndik ha ki Pulit Assam kiba tohkit laitphew jait bad kiba daiñ kuna ruh ïa ki trai shnong,” la ïathuh shuh shuh u Bah Sten.
“Ka KAAC ka da mana ruh ïa ngi ki trai shnong ban leit thoh dieng namarba ka KAAC ka kam trai ïa ka khlaw jong ka shnong ba ka shnong Mukroh ka dei kaba hap hapoh ka jingpeit jingkhmih jong ka KAAC,” u la ïathuh.
Ki nongïalam shnong jong ka shnong Mukroh ki la pyntip ruh ïa ka jingshna surok ka Sorkar Assam lyngba ka KAAC sha ki bor synshar jong ka West Jaiñtia Hills District. Watla ki bor synshar district ki la leit jurip bad pynsangeh mardor ïa ka jingshna surok, khlem da burom shuh ïa ka aiñ, u kontraktor u la bteng ban shna ïa ka surok tang shu mih u Magistrate na shnong Mukroh.
Ki la kyntu ïa ka Sorkar Meghlaaya ban ai jingïada da kaba phah ïa ki Pulit ban pahara baroh 24 kynta khnang ban khanglad ïa ki kam be-aiñ da ka KAAC bad ban pynneh pynsah ïa ka shongsuk shongsaiñ bad ban khanglad ïa ka jingshna surok bad ïa ka kper slasha ha Salang, Mukroh da ka KAAC.
Ïa kane ka jingleh donbor jong ka KAAC ka Dorbar Shnong Mukroh ka la ujor da ka ejahar sha ki Pulit ka Barato Out Post bad aiti ruh ïa ka jingujor sha u CEM ka Jaiñtia Hills Autonomous District Council (JHADC) Bah Thombor Shiwat ban tuklar mardor.
