Byrngem ki nongtrei Muster Roll ban tur sha Secretariat bym pynkiew bainong ka Sorkar

Shillong, Nohprah, 03: Ki nongtrei Muster Roll kiba don hapoh ka shatri jong ka All Jaiñtia Muster Roll Workers & Labour Union (AJMRWLU) ha ka sngi Baar ki la rai ban tur sha Secretariat ha ka 17 tarik mynta u bnai namar ka jingbym leh eiei jong ka Sorkar Jylla ban pynkiew ïa ka jingsiew Variable Dearness Allowance (VDA) kaba ka Sorkar ka la dei ban pynkiew naduh ka 1 tarik Risaw 2024 bad ka Floor Basic Rate (FBR) kaba dei ban kyntiew shisien san snem naduh ka 1 tarik Risaw 2023 katkum ka Minimum Wage Act 1958.
U nongaibuit jong ka Union u Bah KL Pariat ha ka jingïakren bad ki lad pathai khubor ha Shillong u la ong ba kane ka jingdawa ka long namar ka jingkiewdor ha ki marbam mardih kaba la ktah ïa ka ïoh ka kot jong ki nongtrei bylla sngi.
U la ong ba la san snem mynta ka Sorkar kam pat pynkiew satia ïa ka bai bylla sngi kaba dei ban long manla ka san snem. “Ka jingpynkiew ïa ka bai bylla kaba khatduh eh ka dei ha u snem 2018 bad ladei ban pynkiew biang ha u snem 2023, hynrei haduh mynta ka Sorkar Jylla kam shym la pynkiew satia bad kumjuh ruh ïa ka Variable Dearness Allowance kaba dei ban pynkiew ar sien shisnem,” la ïathuh u Bah Pariat.
Ïa ka VDA katkum ka Minimum Wages Act jong ka Sorkar Pdeng ka kren shai ba ki Sorkar Jylla ki dei ban pynkiew ïa ka bai bylla manla ka san snem, ïa ka bai leit bai wan dei ban pynkiew ar sien shisnem kata ha u bnai Ïaiong bad ha u bnai Risaw manla u snem ïa kaba ka Sorkar Jylla kam shym la pynkiew haduh mynta.
U Bah Pariat u la pynkynmaw ba dei ha ka jingïakhih jong ka Union kaba la pynlong ha u snem 2018 ba ka Sorkar Jylla ka la pynkiew ïa ka bai bylla sngi. “Imat mynta ruh ki hap ba ngin pynlong noh da ka jingïakhih khnang ba kin ïoh ïa la ka jong ka hok kaba la kdew shai katkum ka ai,” u la bynrap.
Shuh shuh u la ïathuh ba ki nongïalam jong ka Union ki la leit ban ïakynduh ïa u Myntri uba khmih ïa ka tnat Labour bad ïa u Commissioner and Secretary ka tnat Labour ban pynsngew ïa kane ka jingdawa hynrei ki nongïalam ka seng kim shym la ïoh satia ïa ka jubab kaba shai.
Ka President jong ka Union ka Kong Meri Shangpung ka la ïathuh ba ha rilum Jaiñtia ki nongtrei Muster Rol kim ïoh khaw reshon namarba la kheiñ ba ki dei ki nongtrei Sorkar.
“Haba ngi la pyrshang ban wad jingtip na ki dukam sam marbam reshon, ka jubab kaba ngi ïoh ka long ba ñiew ïa ki nongtrei Muster Roll kum ki nongtrei Sorkar kumta nigm ïoh satia ïa u khaw reshon,” la ïathuh ka President jong ka seng.
Ki jingbym ïoh ïa u khaw reshon da kiba trei Muster Roll ka dei kaba la slem bha sha rilum Jaiñtia baroh kawei.
“Ki nongtrei Muster Roll kim dei ki nongtrei Sorkar bad ki dei tang ki nongbylla sngi bad ka Sorkar ka khate ïa ka bai bylla sngi lada ki pep trei,” ka la ong bad bynrap, ‘ngi la leit ïakren wat ïa u Deputy Commissioner jong ka District hynrei haduh mynta kim ïoh satia ïa u khaw reshon.”:
“Katkum ka jingpynbna jong ka Sorkar ka long ba tang ki nongtrei Sorkar kim lah ban ban ïoh ïa u khaw reshon bad lada don kiba ïoh ruh ki dei ban pynphai noh ïa ki Ration Card sha ka Sorkar hynrei kaba sngew lyngngoh ka long ba ki nongtrei Muster Roll kiba dei tang ki nongbylla kim ïoh satia ïa u khaw reshon,” ka la ong.