Jurip ka kynhun na Delhi ïa ki par dewïong ha Meghalaya, kwah pynim biang ïa ka small-scale mining
Ka jingkyrmen ïa ka paidbah kiba ap kamai na u dewïong
Shillong, Risaw 11: Hadien 12 snem ba ka jingkhang jong ka NGT ka la khang ïa ka jingtih dewiong ha Meghalaya, mynta ka jylla ka la ïaid sha ka jingsdang biang kaba la buh ryntih.
Ka high-level technical team jong ka Union Coal Ministry, ha ryngkat ki heh jong ka CMPDIL bad ka DGMS, ki la jurip ïa ki jaka ba don dewïong ha East Jaiñtia Hills bad Khasi Hills ha ka taiew ba la dep, la pyntip ka Directorate of Mineral Resources ha ka sngi saitjaiñ.
Ïa kane ka jingleit jngoh la synran lang ophisar ka state directorate bad ka dei shi bynta jong ka jingiakren kaba bteng hapdeng ka Shillong bad ka Delhi ban pyntreikam ïa ka small-scale, scientific mining.
Kane ka jingpynbor ka long hadien ba u Myntri Rangbah ka Jylla Conrad K. Sangma u la ïakynduh ïa u Union Coal Minister u G. Kishan Reddy ha New Delhi ha ka 7 tarik u Naitung bad pynpaw ïa ka jingbun jong ki longïing kiba shaniah ha u dewïong kiba la shah ktah ha ka kamai kajih jong ki naduh ba la khang ïa u dewïong ha u snem 2014.
Ha ki jingleit jngoh ïa ki jaka, ka kynhun jong ka sorkar pdeng ka la pule ïa ki rukom tih dewiong kiba la don lypa bad ka la bishar bniah la lah ne em ban sdang biang ïa ki kam da kaba suk bad kaba neh hapoh ka ain.
Hadien, ha ka jingïalang bad ki heh ophisar jong ka jylla, ka kynhun ka la ïakren ïa ki jingeh kiba ki nongtih dewiong trai ri ki ïakynduh bad kaei kaba ka rukom tih dewiong kaba kyrpang jong ka Meghalaya kan donkam – da kaba kheiñ ïa ka jinglong tynrai jong ka jylla bad ka jinglong trai jaka jong ki paidbah.
Haba pynkynmaw biang ïa ka jingïeng jong ka sorkar jong u, u Myntri Rangbah u Conrad K Sangma u la ong, “Ka sorkar jong ngi ka thmu ban wad ïa ki lad ki lynti kiba lah ban sdang biang ïa ka jingtih dewïong ha Meghalaya, da kaba pynïahap ïa ka roi ka par bad ka jingkitkhlieh ïa ka mariang.Da kaba ïatreilang bad ka Ministry of Coal bad ki nongtih dewiong na ka thaiñ, ngi lah ban thaw ïa ka rukom treikam kaba pynthikna ïa ka jingtreikam tih dewiong kaba neh, kaba shngain bad kaba stad.”
Shuh shuh ka sorkar ka la ong ba la khmih lynti ïa ki jingkhmih bniah bad jingiasyllok ha ki taiew ban wan namar ba ka Directorate of Mineral Resources ka dang ïai bteng ban ïatreilang bad ka bad ka sorkar pdeng ban rah ïa ka kam shakhmat.