Jowai, Nohprah 04: Ïa ka sngi kyrpang kiba don jingduna ha ki dkhot met, ne ka “International Day of Persons with Disabilities” la rakhe ha kane ka 2 tarik u Nohprah, 2024 ha Khadar Nor Secondary School, Shangpung West Jaiñtia Hills District, halor ka phang kaba ong “Amplifying the Leadership of Persons with Disabilities for an Inclusive and Sustainable Future”.
Ïa kane ka prokram la pynlong da ka Jan Vikas Samiti JVS ha ryngkat ka jingïatreilang bad ka Hans Foundation, ka Kyrmen Foundation bad ka District Legal Services Authority (DLSA), West Jaiñtia Hills. Ka jingthmu ba kongsan jong kane ka prokram ka long shi bynta ban ai jinghikai halor ka hok, ka jingsynñiang bad ka jinglong nongïalam wat hapdeng ka jingduna ha ki dkhot met.
Ha kane ka sngi la pynlong ruh ïa ka jingïakop slogan halor katei ka phang, ha kaba ki nongbishar ki kynthu ïa ki briew na ki NGOs, ki nongïalam skul, DLSA bad na ka Kyrmen Foundation.
La sdang ïa ka jingïalang da ka jingkren pdiang na ka kong Risaka Challam, JVS Lead Consultant, la ïoh ruh ka jingkren na u ma Helarious Shylla, THF Program Manager, uba la pynsngew shaphang ka jingjop jong u B.G Dkhar uwei na kiba duna ha ki dkhot met, kiwei de kiba ai jingkren ki long u Ripos Robert Lyngdoh, Kyrmen Foundation bad ka Ferina Lyngdoh, DLSA halor ka hok Rights of Persons with Disabilities Act (RPWD),
Ha kane ka sngi la sam ruh ïa ka khusnam sha i Daiashwa Iakai & Happyway Pakma kiba la shim ïa ka kam ri syiar bad ri sniang.
La pynshong shit ïa kane ka prokram da ki jingïalehkai Sports ba la shim bynta da ki briew kiba duna ha ki bor met lem bad ki khynnah skul ha ka balloon race, blindfold penalty shoot bad kiwei kiwei de ki jait jingïalehkai.
La pynkut ïa kane ka prokram da ka jingsam ïa ki khusnam, ka jingsoi kyrteng bad ka jingïashon dur. Katba ïa ki kyntien ai khublei la ïoh na Jostina Rabon, hadien kane la don ka jingïaid rally kum ka dak ban pynsngewthuh paidbah.
Baroh kiba la wan sha kane ka prokram ki don 120 ngut kynthup ïa ki briew ba don jingduna ha ki dkhot met, ki khynnah skul, ki nonghikai, ki nongïalam shnong, ki NGOs bad ki briew sorkar.
