Khliehriat Iaiong 02 : Ka Seiñ Kur Dkhar, East Jaiñtia Hills District, ka pynbna paidbah ba kan pynlong ïa ka jingïakop shad bad ha kajuh ka por yn pynlong ruh ïa ka Fete, kumta ka Seiñ Kur ka pdiang sngewbha ïa baroh kiba kwah ban wan ïa shim bynta ha kane ka jingïakop kaba yn pynlong ha ka 8 tarik u ïaïong 2023, ha Eastside Inn. Jalyiah.
La bthah ruh ba kito kiba kwah ban ïa shim bynta ki lah ban thep kyrteng online lane da kaba phone ha u number 9615400135 ; 7005079043 bad yn pdiang tang ïa kito kiba wan thep kyrteng kham kloi bad yn pdiang tang ar phew ngut, ka bai thep kyrteng kan long T200 tyngka marwei, ka jingthep kyrteng online kan sdang naduh ka 1 tarik u iaiong.
Kiba jop ha ka kyrdan ba nyngkong (1st Prize) kin ïoh rah da ka khung pisa kaba T.7000 tyngka, ha ka kyrdan ba ar (2nd Prize), kin ioh T.4000 tyngka bad ha ka kyrdan ba lai, kin ioh T.2000 tyngka.
Kito kiba la thep kyrteng, ki dei ban poi ha Eastside Inn, ha shwa ka por 7 baje janmiet.
Ka jingthmu jong katei ka Sein Kur, ka long na ka bynta ban pynmih pisa na ka bynta ban ïoh ban shna ïa ka ïing treikam ba pura jong ka Kur, kaba la sdang ban shna mynta ha Mookhep.
La ong ruh ba ha kane ka Fete, kan don ka ïew ka ban die ïa ki jait tiar bapher bapher, ka jingpyn khalai nusip, ka housie bad kiwei kiwei bad yn sdang naduh ka por 10 baje mynstep bad yn pynkut ha ka por 10.30 mynmiet
Na ka liang u Ad. General Secretary Seiñ Kur Dkhar, East Jaiñtia Hills District, u bah M.H.Dkhar, u kyntu ïa baroh ki para kur Dkhar, khamtam kito kiba na East Jaiñtia Hills District, kumjuh ruh ïa ki paralok kiba na jan bad na jngai ba kin sngewbha ban ïa poi lang sha katei ka prokram jingïakop shad bad sha ka Fete, khnang ba kane ka jingthmu jong ka Seiñ Kur kan long kaba jop bad kaba phuh ba phieng.
