KA JINGARSAP HA KA SYNSHAR KHA-DAR KA RI BAD KA JAITBYNRIEW

Ka jingarsap ka dei kawei naki jinglong jingman kaba jyllei bha ha kine ki sngi la haka trei ka ktah, ka kam ka jam ka ktien ka thylliej dap satang ka jingarsap suda. Ngam lah ban batai shai bha shaphang ka jingarsap, hangne ngan ïathuh ïaka jingmut jongka jingarsap kat kum ka jingïathuh jong u wei u riew tymmen.
Nga kylli ïa u, Woh to batai shai ïanga ka ei ka jingarsap? Te u ïathuh ïa nga kumne, ka jingarsap ka long ka jinglong lane ka buit sniew buit bymman kaba don haka dohnud bad ka jinglong jingim jong u briew. Naka jingmut jong ka ktien arsap ruh ngi la sngewthuh hi ba don ar ar, kawei da kumne bad kawei da kumtai, ka jinglong ka jingmut jingpyrkhat lane ka dohnud ka mynsiem kaba don ar ar ha u briew ne ka briew. Kaba pynrem ïa u ba dei ban jop bad pynjop ïa u ba dei ban rem ai ha u bym dei ban ïoh bad pynduh ïa u ba dei hok ban ïoh; haka jaka ban long mar katjuh pynban pynkiew ïa u wei bad pynhiar ïa u wei ka dei ka jingarsap, haba paw leh da kumwei bad haba rieh leh da kumwei. Ka jinglong ka kam bad ka jingleh kaba long ar ar kaba lam sha kaba sniew ka long ka jingarsap.
Haka pyrthei mynta bad khantam eh haka ri bad ka jaitbynriew jong ngi lada ngi peit bad bishar bha te la dap satang ka jingarsap suda;
Kum ïa i khun te naduh basdang pun ruh lapun lyngba ka jingleh pop, ym shuh daka jingïa shongkurim kaba khuid lane kaba tip briew tip blei, kumta naduh ka jingjied ïaki ta ki nongmihkhmat kiban thaw ïaka sorkar ban peit ïaka synshar khadar ruh la jied lypa daka lynti bymdei bad daka jingarsap. Ki kyrtong kiba ïakhun ïaka election ban long kita ki nongsynshar ruh ki mih ban ïakhun daka jingmut jingthmu kaba arsap ym daka hok ka jingshisha. Ha khmat u paitbah te ki leh ki kren kum kiba ieit ri Ieit jait bynriew shisha, ki smai ki kular hakhmat u briew u blei ba lada ki ïoh ïaka jingjop te kin synshar hok bad wanrah ïaka roi ka par bad ka shongsuk shong saiñ. Hynrei na shapoh ka dohnud bad ka mynsiem jong ki pat dap tang ki jingmut arsap suda, bad kata ka long ba lada kin wan haka bor te kin ïoh ban pynheh ïaka khaïi ka pateng ïaka kam ka jam ïaka spah ka phew bad ïaka nam ka burom jong ki shimet daka ba tuh ba lute ïaka hok jong u paidbah haki bun rukom bad bun ki liang.
Naduh ki nongïalam ïaki District Councils ki CEM ki EM bad ki para MDC baroh ruh ki bun kiba arsap suda. Haka jaka ban pynneh pynsah ïaka riti ka dustur kim leh kim ïabna ei ei. Haka jaka ban pynneh pynsah ïaka khyndew ks shyiap ki long pynban ki nong bynda haki poi ei shisngi, lada pan NOC daki bar jylla heh spah ban shna Cement Factories ban shna Coke Factories te ki kloi ban ai hynrei lada ïaleh Patta ïaleh Land Holding Certificate daki trai ri jong ngi te daki snem ruh ym ïoh.
Ki syiem ki sordar ki Waheh Chnong ki dolloi ruh ki long kumjuh. Wat ki officer haki department bapher bapher ruh ki long shibun kiba arsap bad khyndiat eh kiba trei hok ïala ka kam.
Ki seng bhalang kiba ïeng ïaleh laitluid naka bynta ka hok jong ki paidbah jong ka ri bad ka jaitbynriew ruh ki long pynban ki seng sniewlang kiba ïadon bynta lang haka bamtuh bamsap bad kiwei kiwei ki kam be-aiñ hapoh ka ri bad ka jaitbynriew.
Ka long shuh shuh kaba sngewsih ba wat haki kam ñiam kam Balang ruh labun satang ki jingleh arsap suda. Nga ïoh sngew ïaka wei ka sermon haka wei ka jingïaseng kaba u nongkren u ong kumne:
Shisien don u wei u tymmen basan haka wei ka balang u leit tuh syiar bad set ïaka hapoh khoh bad leit jingïaseng shwa hashwa ban ot doh ïaka namar ba dei ka miet balang kaba u don programme ban kren halor ka subject kaba ong, “Men ym tuh”. Ha jingïaseng u la kren stad kren shongshit bha halor kane ka subject haduh ba ki nongsngap kila ang lyngngoh bad ïaroh ïa u.
Mar shu lait jingïaseng, ka kurim jong u kala sngew lehraiñ bad sngewshong pop ïaki jingleh jong u bad ka leit kloi kloi sha ïing bad pyllait ïaka ta ka syiar napoh khoh.
Tang shu poi ha ïing, u law coat buh Baible buh kot jingrwai bad shim tari noh bad ot ïakata ka syiar. Ynda u kyndang ïaka ta ka khoh, pleng kata ka syiar kam don sur. U kylli naka lok jong u shaei kata ka syiar. Ka ïathuh ïa u baka la pyllait. U ong ïaka balei baka pyllait, ka ïathuh ïa u baka sngewrem bad sngewpop ïaka ba u kren ha jingïaseng. Pynban haka jaka ban sngewthuh bad kylla kaba mut u kynhied pynban bad ong ïaka ba ka dei ka briew kaba bieij ban pyllait ei ïaka doh kaba la set ha ïing bad ki jingkren jong u ha jingïaseng ki long tang ki jingpyndep rukom bad u kren ruh naka bynta kiwei ym naka bynta jong ki.
Ka jinglong jingman haka synshar khadar haka imlang sahlang haka ñiam ka rukom haka ri bad ka jaitbynriew Hynñiewtrep jong ngi ka long ka long thik kumne.
Kum ka jaitbynriew kaba tipbriew tip blei kaba kamai ïaka hok bad kum ka jylla Khristan hato ngim sngew long pop mo ban leh kumne? ïoh ba ngin long kiba shah tim kum ba u Jisu u tim ïa ki pharisi ki sadusi.