To ngin ïaklet noh ïa ka jingsngew party ka jingïabishni para briew, ong u Dr. D.R.L. Nonglait ha Nongstoiñ

Nongstoiñ, Jymmang 26: Ki nongïalam jong ka National Peoples Party ha kane ka sngi hatmajai ka 26 tarik Jymmang ba kynthup ïa u bah Prestone Tnsong state president uba dei ruh u Symbud Myntri Rangbah ka jylla, u bah Hamletson Dohling Working president u bah Gabriel Wahlang MLA ka Nongstoiñ, u Dr. D.R.L. Nonglait uba dei u kyrtong MP na ka bynta ka Election shiteng samoi ka ban sa long shen, u Bah Himalaya M. Shangpliang bad kiwei kiwei ki nongïalam ki la hiar sha Nongstoiñ ban pynlong ïa ka jingïalang paitbah na ka bynta ban pynshai ïa ki mat trei kam jong ka party.
Ha katei ka sngi la pynlong ïa ka jingïalang paitbah ha market complex hakhmat ïew Nongstoiñ ha kaba la pynïaid da u bah G.Marbañiang secretary ka shnong New Nongstoiñ. Ka jingïalang ha katei ka sngi ka la ong kaba ïaid beit ïaid ryntih ha kaba ki paitbah na kylleng ki shnong jong ka thaiñ Nongstoiñ ki la wan ban sngap bad ki la shah shkor dngong ïa kaei kaba ki nongkren ki pynshai ha ki.
Ha katei ka jingïalang la ïoh ïa ka jingkren na u bah Hamaletson Dohling, working president ka NPP, u bah Prestone Tynsong President ka NPP hapoh ka jylla uba dei ruh u Symbud Myntri Rangbah bad khatduh eh la ïoh ïa ka jingkren na u Dr.D.R.L. Nonglait uba dei u Kyrtong MP ha kane ka Election shiteng samoi na ka Shillong Parliamentary seat. U bah Prestone Tynsong haba pynshai sha ki paitbah u la ong ba ka sorkar MDA kaba la ïalam da ka National Peoples Party naduh ba ka la bat ïa ka bor synshar ha ka jylla ka la pyrshang ban trei shitom katba kot la ka bor ban shakri ïa ki paitbah ha ki liang baroh naduh ka koit ka khiah, ka pule dangle, ka roi ka par bad kiwei kiwei.
U la ong ruh ba ha kaba ïadei bad ki surok ka sorkar ka la pynlut da ki spah klur tang ha West Khasi hills .Nalor kata u la ong ruh ba ki don bun ki paitbah kiba thum da kaba ong ba ki khlem ïoh jingïarap ei ei na ka sorkar hynrei u la kyntu ïa ki ba kin ïai shah namar ka sorkar kam lah ban leh lut tang shisien ïa baroh hynrei kan sa pyndep bad pynpoi ïa ki kam pynroi kumba ki paitbah ki kwah. U symbud Myntri Rangbah u la ong ruh ba ka sorkar ka kwah ba ki paitbah kin ïatreilang ha baroh ki liang namar lada khlem ka jingïatrei lang yn ym lah ban pynurlong ïa ki jingangnud jong ki paitbah ha ka jylla. Ha kajuh ka por u la kyntu ïa ki paitbah ba kim dei ban shah ïalam bakla ha kiwei pat lyngba ki ktien jail jaum hynrei ki dei ban peit ïa ka jinglah ban trei kam khnang ba ka roi ka par , ka ïoh ka kot kan kiew.
Hadien ka jingkren jong u Synbud Myntri rangbah la ïoh ïa ka jingpynshai na u Dr.D.R.L. Nonglait halor ka jingmih madan jong u ban ïa ai reng ha kane ka M.P Election shiteng samoi. U Dr. Nonglait haba pynshai sha ki paitbah u la ong ba kum u nongïalam jong ka Seng ki Nongthoh Kot Khasi u don ka jingthrang bad ka jingangnud ban kyntiew ïa u pait Khasi Pnar ha ki liang baroh. Nalor kata u la pynshai ruh ba ha ka jinglong nongïalam jong u ha katei ka seng u don ka jingangnud ba ka sorkar pdeng ka dei ban pynrung noh ktien Khasi ha ka Khyrnit kaba phra jong ka Riti synshar. Ha kajuh ka por u la ong ba lada ki paitbah ki ai ka jingkyrshan ba pura bad un poi sha ka thong un leit sha ka Dorbar Parliament ha Delhi ym kum u nongmihkhmat tang jong ka NPP hynrei u nongmihkmat jong baroh u paitbah jong ka jylla.
U Dr. Nonglait u la ban jur ruh ïa ki paitbah da kaba ong to ngin ïaklet noh ïa ka jingsngew party , ka jingïapeit khmat iwei ïa iwei, ka jingïabishni, ka jingïakdew kti hynrei ngin wanrah ïa ka jingïalong shitylli bad ban ïatei iwei ïa iwei pat namar ka jingïakdew kti, ka jingïawoh dong kan ym poi shaei shaei ruh hynrei ha kaba kut ka wanrah pynban ïa ka jingjot bad ka jing pait jingpra jong ka jaitbynriew.