Ki kmie ki kpa kim dei ban phah skul ïa ki khunrit lada ki don jingshit ba pur ka khlam ñiangpyrsit

Nongpoh, Jymmang 26: Ka tnad ka koit ka khiah jong ka Ri-Bhoi District lyngba ka ophis jong ka District Medical and Health Officer (DM&HO) ka la pynmih ïa ka jingmaham bad kyntu ïa ki nongshong shnong ba kin long kiba husiar bad shimkhia ïa ki lad jingïada hadien ba ka khlam Niangpyrsit kala pur sted ha ri Bangladesh, kaba la ktah ïa palat 60 hajar ngut ki briew bad palat 500 ngut ki la khlad, khamtam eh ki khynnah.
Haba kren sha ki lad pathai khubor, ka Dr. Alisha J. Syiemlieh, kaba dei ka District Surveillance Officer (IDSP), Ri-Bhoi District, ka la ong ba ka tnad ka koit ka khiah ryngkat bad ka ophis u Deputy Commissioner ka la shimkhia ban pynmih ïa kane ka jingbthah namar ka Ri-Bhoi ka dei ka district kaba don ïa ka National Highway-6, kaba bun ki nongleit nongwan ki ïaid lyngba man ka sngi. Ka la ïathuh ruh ba ka tnad ka la lap ïa katto katne ki khynnah kiba la shah ktah ha kane ka khlam.
Ka Dr. Alisha ka la batai ba haduh mynta ym pat don dawai kaba kyrpang ban pynkoit ïa une u jingpang, hynrei don pat ka injekshon kaba lah ban jingïada na ka jingshah ktah ha u Niangpyrsit. Kumta ka la kyntu ïa ki kmie ki kpa ba kin phah injek ïa ki khun jong ki khnang ban ïoh jingïada.
Ka la ong ruh ba ki dak ki shin jong une u jingpang ki kynthup ïa ka jingkhluid met, jingïyrhoh bad ka jingmih ki dak saw kiba rit ha ka met. Lada don kino kino kiba paw kine ki dak ki shin, dei ban leit mardor sha ki jaka ai jingsumar khnang ban ïoh jingïarap bad jingïada kaba kloi.
Shuh shuh, ka la kyntu ïa ki kmie ki kpa, ki nonghikai bad ki skul ba lada lap ïa kino kino ki khynnah kiba don kum kine ki dak jingïasyriem, kim dei ban phah skul ïa ki hynrei dei ban pynjngai na kiwei pat namar kane ka jingpang u dei uba lah ban pur sted bha sha kiwei.
Ka la bynrap ruh ba lada ym shimkhia ïa ki lad jingïada bad jingïarap ha ka por kaba biang, kane ka jingpang ka lah ban poi wat sha u pud ka jingma bad wat jingïap ruh, kumta ka jingïatreilang jong ki paidbah bad ka jingphikir paidbah ka long kaba donkam bha ban tehlakam ïa ka jingpur jong kane ka khlam.