Mawkyrwat, Ïaïong, 02: Kawei ka longïing ka la mad ïa ka jingjia ba sngewsih ïa ka jingpluh ding noh ha shnong Mawphansaw, South West Khasi Hills District haka 31 tarik, u Lber, 2023 jong ka step sngi thohdieng ha ka por kumba 11 baje ei ei katba ki dang don sha khlaw ha ka por ba ym don briew ha ïing. Kane ka ïing ka dei jong ka kong Shainphyrnai Syiemiong.
Ha kane ka jingjia ka ding ka la bam lut baroh ïa ka ïing shet ja jong ki bad ki la duh noh ïa baroh ki jingdonkam kum ki marbam naduh u khaw ba ki shet ki tiar ki tar kum ki khiew ki pliang katto katne ki jaiñ ba ki kup ki sem.
Ka long kaei kaei kaba sngewsih namar ba i long ruh i riewkynthei bad kawei ka khun kynthei bad ki dei ruh naka longïing ba ki shu im ja ruh tang ha ka rep ka riang bad ha kaba mynta ruh ki dang hap ban pyndep la ka jingtrei namar ka dei ka por ban kheit sohmarit. Kumta kane ka longïing ka la shem jingeh ha kaba ïa dei bad ka jingduh noh ïa ka ba ki shong ki sah ban shet ban tiew manla ka sngi.
Na ka liang ka KSU Umdohlun Circle ha ryngkat bad ka KSU Nongmluh Area Unit ha ka 1 tarik Ïaïong, 2023 ki la leit ban kner ïa la ki kti ban noh jingïarap da u khaw bad katto katne ki marbam tang ba kin ïoh ban shet mynta bad la ïoh ruh ban ïarap lang ban shna dara bad ki ha kajuh ka sngi ba kin ïoh ban shong shet ja biang shipor.
Ngi pynpaw ruh hangne ba ka tnad ba dei peit ïa kum kine ki jingjia pluh ïing lada dei na ka Block Department bad ruh kiwei kiwei ki shnat treikam jong ka sorkar Jylla ba ki dei ban ai lang ki lad jingïarap khnang ba kan long ka jingbit jingbiang kumba ju long bad ka jingmyntoi ïa kane ka longïing ba ngat ha kane ka apot.
