Nongstoiñ, Lber 2: ‘Ka jingthaw jong ka sorkar ïa ka Komiti pynbeit pud bad ka jylla Assam, kaba ki nongïalam bad ki dkhot katei ka Komiti ki la dep ki la hiar ban leit jurip sha ki shnong khappud, ka la pynlong ïa ki paidbah ba kin ap khmih lynti dngong tad lano kin ïoh sngew ba ki ar tylli ki sorkar jylla kin pyndep noh ïa katei ka kam’, ong u bah Trasdingland Nonglang sordar barim ka shnong Mawsikar, u ba la ong ruh kum u President ka synjuk ki nongsynshar shnong kaba nyngkong tam ha ka hima Raidmynsaw kaba la tip kum ka Village Organisation Adminis-tration Langpih Circle (VOALC).
U bah Nonglang u la ong ruh ba kum u nongïalam jong katei ka Organisation kaba nyngkong duh ha ka thaiñ Langpih kaba la ithuh ruh da ki bor sorkar, u don ka jingangnud ba lada ka jingïapynbeit pud bad ka Assam kan urlong, na ka bynta ka jingbit jingbiang jong ki nongshong shnong.
U la ong ruh ba u tip bha halor ka jinglong jingman ha katei ka jaka, namar ki don ki nongshong shnong kiba don ïa ki kyrteng ha ki electoral roll jong ka Meghalaya bad jong ka Assam. Nalor kata u la ong ba ki don ruh ki shnong Khasi kum ka Mawlan, Mawdiangsnam, Iewnongma bad kiwei kiwei kiba ki nongshong shnong ki la ïoh jingïarap na ka sorkar Assam da ki skhim shna ïing bad kiwei kiwei.
Shuh shuh, u la ong ruh ba kiwei pat ki mat kiba donkam ba ka sorkar ka dei ban shim kum ki nongrim kiba skhem, ba ki jaka ki dei hok ban hap hapoh Meghalaya ki dei ki skul bad ka jingdon jong ki kam pynroi kiba ai jingmyntoi ïa ki paidbah, kum ki jingtrei kiba la pyntrei lyngba ka skhim shi spah sngi da ka Mawshynrut C&RD Block.
U la ong ba ki skul kiba don ha katei ka thaiñ naduh ba ka Meghalaya kam pat ïoh ïa ka jylla ba pura, ki long ka Langpih Government L.P skul, Nongma Government L.P skul, Mawdiangsnam Government L.P Skul bad kiwei kiwei. La ong ruh ba kumba long ha ka shnong Mawsikar, baroh ki skhim kiba ai jingmyntoi ïa ki paidbah kum ka skul, ki jingtrei shispah sngi, ka bording bad kiwei kiwei, ki dei kiba wan na ka sorkar Meghalaya.
Nalor nangta, ka jingdon jong ka surok rong ba la shna da ka sorkar Assam, kam dei kaba ki paidbah ki pan ne ki kwah. Hynrei ka dei kaba shu shna jubor bad ka jingailad jong ki nongshong shnong, ka dei namar ba ka don ka Status Quo ha kaba ki khmih lynti ba ka sorkar Assam ruh kan burom lem bad kan ym pynthut lada ka sorkar Meghalaya kan pyntrei ïa kino kino ki skhim ha katei ka thaiñ.
U la ong ruh ba ka sorkar Assam ka la pynpoi ruh ïa ka bording ha katei ka shnong, hynrei na ka liang ki paidbah ym don uwei ruh uba shim bording na ka Assam hynrei baroh ki longïing ki shim ïa ka bording na ka MEPDCL.
U la kyntu ïa ka sorkar ba ia kito ki nongshong shnong kiba don kyrteng ha ki electoral roll jong baroh ar tylli ki jylla, kam dei ban ailad hynrei ka dei ban leh da kaba tyngeh. Namar, dei na ka jingdon jong kiba kum kito ki briew kaba la wanrah ïa kiba bun ki huri hura bad kaba pynlong ruh ïa ka sorkar Assam ba kan kam trai ïa katei ka thaiñ.
