Dibrugarh, Nohprah 16 : U MLA barim ka Arunachal Pradesh u Yumsem Matey, ula shah siat iap ha ka kynhun ki ehrang kaikhlaw ha ka shnong Rahu kaba hap hapoh ka Lazu Police Station jong ka Jylla Arunachal Pradesh mynta ka janmiet sngi Saitjain.
Kat kum ka khubor, une u MLA barim ula leit ïashim bynta ha ka jingïalang ha ka shnong Rahu kaba hap hapoh ka Tirap District mynta ka janmiet bad ka kynhun ki samla ki la rahbor ïa u shajan ka khappud India-Myanmar bad siat iap syndon ïa u.
U Matey u dei u MLA ka Khonsa (West) naduh u snem 2009-2014 na ka ticket jong ka Congress bad ha u snem 2015 ula leit ban pynïasoh ïalade sha ka BJP.
U dei u kyrtong uba la pynkhreh ban ïakhun ïa ka elekshon MLA ban wan na Khonsa (West).
“Une u MLA barim ula shah patan sha khappud India-Myanmar bad shah siat iap ha ki kynhun kaikhlaw. Hynrei ym pat lah ban tip ka kynhun kaikhlaw aiu kaba leh ïa kane ka kam” ong ki heh Sorkar.
Na ka liang ki bor pahara, ki la pynlong ïa ka jingkhynra kaba jur ban ïoh kem ïa kine ki kaikhlaw kiba donkti.
Ha u snem 2019, u MLA ka West Khonsa Tirong Aboh lem bad 10 ngut ki nongkyrshan jong u, ki la shah thombor ha ka kynhun ki kaikhlaw ha ka shnong Bogapani kaba hap hapoh ka Tirap District.
Ka Tirap, Longding bad Changlang(TLC) jong ka Arunachal Pradesh ki dei kiba la shah pynbna kum ki disturbed area bad ki la shah pynhap hapoh ka AFSPA ha ka MHA.
