Ki MLA ki shakri 5 snem ki la ïoh penshon, ma ngi pat 30 snem ngim ïoh eiei: Babu ED Nongsiang

Shillong, Nohprah, 16: U President jong ka Meghalaya Retired Deficit School Teachers Association (MRDSTA) u Babu ED Nongsiang, ha ka sngi Saitjaiñ u la pynpaw ïa ka jingsngew bynñiaw halor ka jingbym ïoh baibam tymmen jong ki nonghikai skul Deficit ynda ki la shongthait hadien ka jingshakri kumba 30 snem ban noh synñiang sha ka pule ka puthi bad sha ka jylla.
Ha ka jingïakren bad ki lad pathai khubor hadien ba la wai ka jingïalang kaba la long ha Jail Road Boys Higher Secondary School, Jail Road, Shillong u Bah Nongsiang u la ong, “ki don (ki nonghikai skul Deficit) napdeng jong ngi, kiba la shakri 29 snem, 30 snem wat haduh 35 snem hynrei ynda la shongthait kim ïoh eiei. Kane kam ïahap. Ngi tip ba u MLA lada u jop shi samoi ruh u la ïoh baibam tymmen, tang san snem u la ïoh baibam tymmen. Kam ïahap shuh ka rukom trei kaba tang 5 snem bad ka 30 snem.”
“Ka sorkar ka ai ïa ki (MLA) namarba ki shna hi ïa ka aiñ ban ai ïalade, katba ïa ngi ki nonghikai kiba ïaksaid katno katno ruh ka eh,” u la ong.
“Ngi kynmaw ha u 1996-1997, ka don ka Fourth Pay Commission, ki (Sorkar) mut pynduh noh (ban ai ïa ka Fourth Pay Commission) ïa ki nonghikai skul Deficit. Da ka jingïakhih, ngi la ïoh ïa ka Fourth Pay bad ka Fifth Pay Commission leilei ngi ïoh da kaba suk nabar ngi la ïakhih na shwa,” la ïathuh u Babu Nongsiang.
Haba bynrap lang ïa kane, u Vice President jong ka Association u Babu Ronjit Marbaniang u la ong, “u Founder President jong ka Khasi Jaiñtia Deficit School Teachers Association (KJDSTA), Babu Teibor Shanpru, u dang im, mynta kumno ngin ieh ïa u. U dei uba la lamkhmat ban kyntiew ïa ka pule ka puthi, hynrei ngi sngewsih ban ong ba mynta ka pule ka puthi ka la hiar sha trai.”
Da kaba pynpaw ïa ka jingbym shngaiñ ka lawei jong ki pateng ba mynta kiba kwah ban long nonghikai skul, u Babu Ron u la ong, ‘mynta kiba dei ban wan sha kam hikai, haba ki ïohi ïa ka “Security” ïa ki kam don, kam pynshlur ïa ki nonghikai kiba la tbit bad ban rung sha ka kam hikai skul bad kiba rung (sha ka kam hikai skul) ka long tang namarba kim ïoh kam. Ha ka juk mynta, ki kmie ki kpa kin ym phah ïa ki khun ki kti jong ki ban long ki nonghikai namarba ki ïohi ïa ka jingïaksaid jong ngi ka long kaba eh haduh katta katta,” bad bynrap, “ynda ngi la phong ïa kane ka juti kaba ngi la shongthait ngi sngewthuh bha.”
“Ngi la ïakren bad ka Sorkar Jylla ïa ka baibam tymmen naduh ka por ba u Dr. Mukul Sangma u dang long u Myntri Rangbah. Haba ngi pynpaw ïa kane, u sngewsynei, u sngewsih. U ïam, haba u kynmaw ïa ka jingeh kaba ki nonghikai ki mad, khamtam ki kmie ki kpa jong u, kiba dei ki nonghikai. Kane ka dei ha ka 11 tarik, Lber, 2015 ha Assembly,” la pynkynmaw u Babu Ron.
“Kaba sngewsih kaba ngi hap kynthoh ruh ïa ki nongmihkhmat badonburom jong ngi, ki shakri 5 snem ki la ïoh ïa ka (penshon), hynrei ka tulop jong ngi kaba rit, eiei ruh ngim ïoh. Mynshwa leilei ka tulop Deficit kaba rit, hynrei da ka jingïakhun ka la shu biang, ngim don wat tang ban pynlang pisa ruh, wat ban ai ka jingnang jingstad ïa ki khun ruh ka shem (shitom). Ngi hikai ïa ki khun jong kiwei, katba ïalade patde kaba eh ngi mad. Ka dei kaba eh bha lada ki (Sorkar) kwah ba ka pule ka puthi kan kiew,” u pynpaw u Babu Ron.
“Ka Sorkar ka dei ban weng ïa kine ki jingeh jong ki nonghikai. Ym dei ba ngi pyrkhat tang ïalade ba ngi kren kumne, hynrei ngi pyrkhat ïa ka pule ka puthi jong ka jylla baroh kawei. Ban kiew ka pule ka puthi, ngi donkam ïa ki nonghikai kiba tbit (ban rung sha ka kam hikai skul). Kita ki nonghikai kiba dei ban wan, kin wan kumno, haba tang ban ïoh tulop ruh hap mih sha surok, hap shah synreit um, hap shah shoh, hap shah bom, hap shah tied. Kita ki dei kiei kiei kiba ngi sngewsih ban kynthoh. Ki nongthaw aiñ, lada kim lah ban shimkhia ïa ka pule ka puthi, ka jylla kan ym kiew lano lano,” u la ong.
U la ïathuh ruh ba ki nonghikai skul Deficit ki la hap ban pynlong da ka jingïakhih ban ïoh ïa ka jingsiew DA.
“Ka sorkar kam dei ban sngewthuh bakla ba ngi khlem noh synniang eiei. Ngim ïakren ïa ka (jingnoh synniang) sha ka Pla ïarong jong ka Sorkar, hynrei ngi kren ïa ka “Human Resources,” ngi la noh synniang shikatdei eh na ka bynta ka jingmyntoi jong ka jylla. Kata ka dei kawei ka bynta kaba ka Sorkar ka hap ban pyrkhat bha. Lada ym don nonghikai kane ka jylla kan ym poi hangno hangno ruh,” la ong shuh shuh u Babu Ron.
“Ngi kyntu ïa ka Sorkar, khamtam ïa u Myntri Rangbah ka Jylla uba bat ïa u shabi ban pynïaid ïa ka jylla,” u la bynrap.