Shillong, Nohprah, 16: Ka Meghalaya Retired Deficit School Teachers Association (MRDSTA) kaba long ka kynhun jong ki nonghikai skul Deficit ba la shongthait, ha ka sngi Saitjaiñ ki la kyntu ïa ka Sorkar Meghalaya Democratic Alliance (MDA) ba kam dei satia ban shu leh kyrkieh halor ka jingshim rai ban pynrung bujli da ki kot jong ka NCERT ha ki skul pule ha kane ka jylla Meghalaya.
Ha ka jingïakren bad ki lad pathai khubor u President jong ka Association u Bah ED Nongsiang u la ong, “ha kaba ïadei bad (ka jingshim rai ban pynrung da ki kot pule NCERT) nga sngew ba ka kham biang, ym dei ban pynkyrkieh. Shu buh ki (Sorkar) pynmih (hukum) mynta mynta, bad kin sa ong shim noh (ban pyndonkam) ïa ki kot kam long.”
“Ki kham biang ki kot NCERT ban ïa ki (kot) jong ka Meghalaya Board of School Education (MBoSE), hynrei ka rukom pyntreikam pat ïa kane, ka long kyrkieh. Mynta ki ong (shim rai) la shem snem la pynmih. Ka bym lah ban long, kumno kin lah ban pynbeit bha ïa ki kot,” u la ong.
“Mynshwa ka MBoSE ka da khot lang ïa lang ïa ki nonghikai ban ïasyllok ha kaba ïadei bad ki kot ba la pynmih da ka Board bad ngi la ai ka jingkyrshan ïa ka Board ban peit la ki biang ne kim biang ban shim ïa ki kot ha ki skul. Mynta ruh ka dei ban long kumjuh. Lada ïa ka NCERT la shu pynmih kynsan kynsan, khlem ïasyllok ïano ïano, khlem da ai por ïa ki khynnah skul, ïa ki kmie ki kpa ban hap thied thymmai (ïa ki kot) namarba ki hap bret ïa kot kiba rim bad ki hap ban thied da ki kot kiba thymmai. Ki don ki longing longsem kiba don ïa ki hymmen ki para kiba pule, ki la duh noh ban shim ïa ki kot kiba rim bad ki la hap ban thied thymmai. Kam long ban shu leh kyrkieh, hynrei ka biang eh lada ki leit ïa ka NCERT,”la ong President ka MRDSTA.
Haba bynrap, u Vice President ka MRDSTA, Babu Ronjit Marbaniang, u la ong, “ka Sorkar ka dei ban da iit ïa ki nonghikai ne ïa ki riew shemphang kiba lah ban wanrah na ka bynta ka jingbit jingbiang jong ka jylla haba ki pynmih thymmai ïa ki kot pule.
U la ïathuh ba ka don ka jingïalang kaba la ïakynduh ha kaba ki nonghikai ki la ong, ba ka tnat Pule Puthi kam dei ban leit na bynta ka jingmyntoi jong ki nongpynmih kot, hynrei dei ban leit na ka bynta ka bha ka miat jong ki khynnah skul.
“Nga kynmaw, (ngan ym jer kyrteng) iwei na ki ophisar, i mih syndon na ka jingïalang. Ngi hap ban kynthoh namarba ngi tip. Ka jingwan ki kynrum kynram ha ka pule ka puthi, ka long ba ka Sorkar kam shim naduh mynshwa bad kine ki jingeh ki lang bad ki wan lut mynta,”u la ong.
“Ka pule ka puthi kam dei ban long tang ka pule puthi kaba malu mala hynrei ka dei ban long ka pule puthi kaba don ïa ka dor ha kum kane ka juk ba mynta. Haba ong, ka pule puthi kaba don ïa ka dor, phi la sngewthuh ka mut mano ban rung bad long ki nonghikai,” la ai nuksa u Babu Ron.
