Nongpoh, Nohprah 16: Ka Maitshaphrang LP School kaba dei kawei naki skul bala seng da ka Khasi Student Union haka shnong Jatalong, Raid Nongtung ha Ri-Bhoi District kaba dei ka shnong khappud bad ka Assam kala nangroi nang san haka jingdon ki khynnah skul ban long kum kawei naki shlem ban pynphriang ïaka jingnang jingstad haka thaiñ khappud, bad naka liang ki nongïalam ka seng hynnin ka sngi kila ioh ruh ban leit sam ïaki resol jong ki khynnah skul hadien bala dep pynkhreh pynkhrum da ki nonghikai.
Kum ban shu kdew hangne katei ka skul la seng naduh u snem 2011 da ka seng KSU da ka jingangnud ban tbeh jingshai sha katei ka thaiñ khappud khamtam ka jingangnud ba hakhmat hi jong ka KSU ka dei hi ban kyntiew ïaka pule ka puthi.
Ha katei ka sngi ka jingleit sam ïaki resol jong ki khynnah la donlang da ki nongïalam ka KSU naduh u Samla Pynkmenlang Sanmiet Education Secretary ka KSU sengkmie, Samla Ferdinald Kharkamni President ka KSU NKHD, Samla Banjop Maring President KSU Eastern Border Area, Bah B Sohtun Chairman ka Synjuk ki Rangbah Shnong Border Area, ki nonghikai, ki khynnah skul lem bad ki kmie ki kpa.
Ki nongïalam ka KSU haba kren ha katei ka sngi kila pynpaw ka jingsngewkmen ban iohi ba katei ka skul kala nangkiew shaphrang haka jingdon ki khynnah skul, ban pynurlong ïaka jingangnud jong ka seng ba ka pule ka puthi bad ka jingstad ka dei ka thong ba hakhmat eh, naka bynta ban wanrah kano kano kaa jingkylla haka ri bad ka jaitbynriew.
Kila ong ruh ba ha kum kane ka juk stad kaba mynta ki kmie ki kpa ki dei ban sngewthuh shai ba kim dei ban pynduhmynsiem ïala ki jong ki khun hynrei ki dei ban ai mynsiem ba kin mih shakhmat ban leit pule bad ban bteng haduh ba kin da dep ba katei ka thaiñ khappud kan long kum ka jaka tbeh jingshai ha kaba ïadei bad ka jingnang jingstad.
Kumba long mynta katei ka skul ka don naduh ka klas Nursery haduh ka Klas VI, naka liang ki nongïalam kila angnud ruh ba nang kyntiew kyrdan ïa katei ka skul haduh ka klas X ban nang pynsuk ïaki kmie ki kpa ki bym iohlad ban phah skul ïala ki jong ki khun jngai nala ïing
