Nongpoh, Nohprah 16: Ban pynsaphriang ïaka jingtip kaba kham bñiah halor ka skhim Pradhan Mantri Ujjwala Yojana (PMUY) ka ophis u Deputy Commissioner Ri-Bhoi District lyngba ka tnad Supply mynta ka sngi ka la pynlong ïaka awareness program halor ka skhim sam ei ïaki tyndong shet jingshet sha ki longkmie ba duk ba rangli bala buh thong da ka sorkar pdeng ban pynioh lut ki tyndong shet sha baroh ki shnong nongkyndong haka jingïalang kaba la long ha Auditorium hall ka shnong Harlibagan ha Ri-Bhoi.
Ha kane ka program la wan ban ïadon lang da u Bah Sosthenes Sohtun MLA ka Jirang Constituency, bah Eric Dkhar BDO ka Umling Block, Bhaskar P Baishya District Nodal Officer, IOCL, u P Boro, SI Supply, lem bad kiwei kiwei.
Ha katei ka jingïalang la ioh ruh ban sam ei ïaki tyndong shet jingshet sha ki longkmie kiba duk bad ki dei hok ban ioh (Beneficiaries) bala sam da u kongsan ha katei ka sngi u Bah Sosthenes Sohtun.
Haba kren ha katei ka sngi u Bah Sosthenes Sohtun MLA u la kyntu ïaki nongshong shnong ba kin wan shakhmat ban shim ïa kane ka kabu kaba naka liang ka sorkar ka ai ei da ki tyndong shet jingshet naka bynta ki longiing kiba duk bala mang kyrpad da ka skhim PMUY jong ka sorkar pdeng da ka jingangnud ban pynpoi lut ïaki tyndong shet sha baroh ki shnong nongkyngdong khamtam ki longkmie kiba wan naki longïing ba duk ba rangli.
U la kyntu ruh ïaki longkmie ha katei ka sngi ba kim dei ban kyntaid hynrei ban shim ïa katei ka tyndong shet jingshet da kaba pynbiang ïaki kot ki sla khlem da siew pisa naka bynta ban pynsuk ïaki ban shet ban tiew khamtam ba kin lait naka jingleit thohdieng bad ban pyndonkam da ki dieng hak por shet kaba pynmih ruh ki tdem jaboh kaba lah ban pynsniew pat ïaka lyer ba ngi ring mynsien.
Namarkata naka liang u Bah S Sohtun u la pynpaw ba katei ka skhim ka long shisha ka jingkyrkhu ïaki longkmie kiba duk ba rangli ba kin ioh pdiang ei ïa katei ka tyndong shet naka sorkar bad khamtam ban pynphriang ruh ka khubor sha kiwei ba kin tip halor ka jingdon jong katei ka skhim sorkar, u la bynrap.
