Shillong, Nohprah 16: Mynta ka sngi ka kynhun shipai BSF kiba dei na ka 4th Battalion ki la pynlong ïa ka jingai jingsumar ei ïa ki paidbah ha khappud bad ka Bangladesh na ka bynta ki saw tylli ki shnong, Dawki, Bakur, Sankhat bad Jaliakhola ha kaba palat 400 ngut ki briew ki la ïoh jingmyntoi.
ïa kane ka jingai jingsumar ei la pynlong ha ïew Dawki ha kaba ki paidbah nongshong shnong kiba don ha khappud bad ka Bangladesh kiba dei na East bad West Jaintia Hills ki wan ïew wan hat. ïa kane ka jingai jingsumar ei la plie da u K S Rana DIG ba dei peit ïa ka bynta jong ka Jaintia Hills, ha ka jingïadon lang u Pankaj Soodan, Commandant 4 Bn BSF.
Ha kane ka jingai jingsumar ei la peit bniah ïa kiba wan shim dawai da ki doktor jong ki BSF ha kaba palat 400 ngut ki briew kila ïoh ïa ka jingmyntoi na kane ka jingai dawai ei ba la pynlong da ki shipai BSF.
Nalor kane ka jingai jingsumar ei, ki shipai BSF ki la sam ruh ïa ki kor Komputer, ki jingdon kam ha ki skul, ki pangkha, ki klong buh um dih, ki jaka bret niut bad kiwei kiwei bad kine baroh kila kot sha ka T.6 lak tyngka, kine la ai sha ki samla pule bad ki longïing kiba duna ka jingïoh.
Ha ka jingkren K.S Rana DIG ba dei peit ïa ka Jaintia Hills u la ong ba kane ka jingleh jong ki BSF ka long ba ki don kata ka jingkit khlieh ban kyntiew ïaki paidbah kiba don ha khppud bad ka Bangladesh, ïa kane ka jingleh jong ki BSF la ai ïa ka jingïaroh da ki nongkit kam shnong.
