Shillong, Nohprah, 16: Kum ka jingpynkhreh ban kynmaw burom ïa ka jingwan longbriew jong u khunlung Jisu sha kane ka sla pyrthei, MCrown Hotel kaba long ka ing basa kaba don ha Khyndai Lad, Shillong, kumba ju leh manla u snem, ha ka Sngi Saitjaiñ ka la khot sngewbha ïa ki khunswet ba la ri bad sumar da ka Reach Shillong Ministry ban bamja sngi ha 3 Olives Restaurant kaba don hapoh kane ka Hotel.
Hadien ba ki khynnah ki ladep bam, ki nongpynïaid jong kane ka Hotel, ki la ïalam kai ïa kine ki khynnah sha ka jaka pynbyrngia niah kali ïa kaba la tip kyrteng kum ka Playdom by 3 Phoenix kaba don hapoh ka mala jong ka Hotel MCrown ïa kaba la khap ribbon hi da kine ki khynnah. Kine ki khynnah, ki la ïoh lad ruh ban pynbyrngia ïalade da kaba niah ïa ki kali kiba la tip kum ki Bumper Cars.
Ha kane kajuh ka sngi, ka Showroom JN Suzuki ka la rakhe ïa ka Christmas da kaba pynlong ïa ka jingïaid Christmas Carol kaba la sdang na Showroom kaba kaba don ha ka shnong Mawblei bad ïaid lyngba ka shnong Laitumkhrah, Khyndai Lad, Polo, Mawlai bad pynkut biang haduh ha Mawblei.
Ha kane ka jingïaid Carol, da ki thuk thuk ar shaka, la ïashim bynta lang da ki nongtrei jong ka Showroom JN Suzuki bad kumjuh ruh ki Customer lem bad u RJ Zack na ka Red FM.
