Nongpoh, Jymmang 21: Na ka por sha ka por la ju ïa kren ba naduh ka sorkar bad haduh ki kynhun seng kiba ju peit kyrpang ïa ki kam ïalehkai sport ki la ju pynpaw ba ki don kata ka thong ban kyntiew ïa ki samla ha ka kam ïalehkai sport bapher bapher ha Ri Bhoi bad haba phai pat sha kane ka District ki jingshisha ki paw ba hauh kine ki sngi kane ka District kam pat don kano kano ka madan ïalehkai kaba la bit la biang na ka bynta ban pynlong ïa ki jingïalehkai sport bapher bapher.
Dang shen ha ka jingpyn long ka ophis u District Sport Officer ka Ri Bhoi ïa ka Dis trict Level Inter School Sports Meet ha madan Pahamsyiem ka long shisha kaba isangsot ïa ki khynnah skul, namar hapdeng ka jjingktieh ka madan ki hap ban ïalehkai na ka bynta ki jingïa lehkai sport bapher bapher ba la pynlong ha kane ka madan.
Haba ïa kren halor ki kam ïalehkai sports, la ju kren na ka por sha ka por ba ki samla ki dei ban pynleit ïa ka por ha ki kam ïalehkai sport khnang ba kin lait na kino kino ki jingmlien ba sniew kum ka jingdih kyiad, duma bad u drok uba la ap ka jingma ïa ki khun samla kane ka juk ba mynta bad haba kren pat halor ka jingshisha kumno ki samla kin pynleit jingmut ha ki kam ïalehkai sport namar haduh kine ki sngi kam pat don kano kano ka madan ïalehkai kaba la bit la biang ba kin kyllan met ne pynlut ïa ka por ha ki kam ïalehkai sport.
Kino kino ki lympung ïalehkai sport ba la ju pynlong ha Ri Bhoi ki don tang ar tylli ki madan kata ka Madan Pahamsyiem bad ka madan Kurkalang, hynrei hooid ka madan ka don bad ka jinglong jingman jong ki madan pat kam long kaba bit ba biang ban pyn long ïa ki jingïalehkai bapher bapher bad khamtam ha ka por lyiur ne por slap kine ki madan ki la kylla ki madan ktieh na ka daw ka jingbym don kata ka jingpynbha ne ban leh katkum kita ki madan kiba lah ban pynlong ïa ki jingïalehkai sport.
Ka Madan Pahamsyiem ha Nongpoh ka la dei kawei na ka madana kaba la paw bha ha Ri Bhoi ha kaba naduh ki tourna ment phutbol ne kiwie kiwei ki jingïalehkai sport la ju pynlong ha kane ka madan da ki phew phew snem mynta bad haduh kine ki sngi ym pat ju iohi ba ka don kajingkylla ha kaba tang shu poi ka por slap kane ka madan ka la kylla long ka madan ktieh.
Kaba kham sngewsih shuh shuh, ka long ba ha kane ka jingpynlong ïa ka District Level Inter School Sport Meet jong u snem 2022 kaba dang shu kut shen, na ka daw ka jingbym biang ka madan la hap beit ban pynïalehkai ïa ki khynnah hapdeng ka madan ktieh ba ki bor pynïaid ïa kane ka jingïalehkai sport kim banse ban pynïalehkai na ka daw ka jingbym don pat kiwei ki madan kiba la bit la biang.
Halor kane ka bynta, u Nongthoh Khubor, u la ioh ruh ban ïa kren bad ki Nonghikai kiba ym kwah ban pynpaw kyrteng, ki la ong ba kumno ki khynnah skul kin sei ïa ki sap ha ka jingïalehkai sport, lada ïa kane ka lympung ïalehkai sport la hap ban pynlong ha ka madan ktieh bad kum ki khynnah ruh da kajingbym banse ki hap ban shim bynta na ka daw ka jingbym don ka madan kaba la bit la biang.
Ki don ruh ki riew rim kiba la ju im ha ki kam ïalehkai sport la palat 20 ne 30 snem mynta, ki la pynpaw kane ka madan ka dei kaba ki la ju ïalehkai naduh ka por jongki, ha kaba ka dei tang ka madan ktieh bad ki da pynpaw ruh ka jingsngew bynniaw kumno ngin kyntiew ïa ki kam ïalehkai sport lada ki khynnah kim ioh ïa kita ki madan kiba la bit la biang kiba dei katkum ka juk ba mynta.
