Nang jur ka jingsynlen ki khlaw ki btap ha West Khasi Hills ba synjor palat ki aiñ khlaw ha jylla

Nongstoiñ, Jymmang, 21: Ka jylla Meghalaya ka dei ka jylla kaba ki nongshang kai na kylleng sawdong jong ka pyrthei ki angnud haduh katta katta ban wan peit ïa ki jaka jngohkai kum ka Nongkhnum, Maw-phanlur, Lum Kyllang, Mawthadraishan bad kiwei kiwei ki jaka ba itynnad, namar ka jingdon jong ki ‘lawbniap kiba jyrngam baroh shisnem lynter bad ki wah duid kiba sngur bad ki lum kiba ithiang ban peit. Hynrei katba nang mih ki sngi kitei ki jaka ki la nang sniew dur bad kylla rong kat haduh ba la isynei ban peit.
Nalor kata ka jingsynlen ki khlaw kam dei tang ha kitei ki jaka jngoh kai, hynrei ha kylleng ki bynta jong ka West Khasi Hills ki khlaw dieng met, ki la synlen lut lait noh satang ki bynta ba bun ki khlaw dien gkseh kata ruh ha ki bynta ba ki dieng kseh ki dang rit. Kum ban pynkynmaw ba naduh ba la ïoh ïa ka jylla ba pura haduh mynta, ka sorkar jylla kam pat lah ban pyntreikam pura dalade ïa ka Indian Forest Act, Indian Police Service Act bad ka Indian Administrative Service Act, hynrei kitei ki lai tylli ki bynta ki dang hap lang ha ka jingpeit jong ka sorkar Assam.
Ha ka jingwad jingtip bniah jong u nongthoh khubor la lap ba ka jingtlot jong ka sorkar jylla, ka dei na ka jingbym pat lah ban pyntreikam pura ïa kitei ki lai tylli ki bynta kiba kongsan tam kiba lah ban kyntiew ïa ka jylla ha baroh ki liang.
Ka jingsynlen ki khlaw hapoh ka District ym lah ban len ba ka dei namar ka jingbym lah ban teh lakam jong ka tnad khlaw ka jylla ïa ka jingshalan rnga sha ki karkhana saiñ nar kiba don ha Byrnihat bad ha Rwiang ha West Khasi Hills. Nalor kata haba pyrshang ban twad jingmut na kiba bun ki nongshong shnong kiba ai wai ïa ki khlaw ha ki nongkhaïi rnga, ka daw kaba kongsan ba ki ïathuh ka long ba ka dei ka jingban ka jingduk kaba pynlong ïa ki ban aiwai ïa ki khlaw ha ki nongkhaïi rnga.
Ki don pat kiba ong ba ki lah ban leh katba mon ïa la ka jong hynrei katei ka jingong ruh ka dei tang ka jingkren kut lad, hynrei lada ka sorkar jylla ka la lah ban pyntreikam pura ïa ka Indian Forest Act yn ym don u ba nud ban pom wat tang uwei u dieng ruh. Lad peit nuksa ha kiwei pat ki jylla kum hapoh Assam ym ju lap satia ba ki nongshong shnong ki nud ban pom dieng bad wat lada ki pom ruh ki pom katkum ki jingdonkam da kaba pan jingbit na ka tnad khlaw.
Ka tnad khlaw jong ka jylla Meghalaya kam nud satia ban saham ïa ki mafia shalan rnga, namar ka kamram jong ki ka long tang ban shong ophis bad pynleit jingmut kumno ban shna project thung dieng man la u snem, khnang ba ka sorkar kan mang pisa kyrpang na ka bynta ban thied symbai dieng bad pynlong prokram thung dieng man la ka san tarik u bnai jylliew, hynrei haduh mynta ym shym la lap hangno kita ki tynrai dieng ba la thung ki don wat la ka sorkar ka la pynlut da ki phewlakh tyngka.
Ha kaba ïadei bad ka Indian Police Service Act, haduh mynta ka jylla Meghalaya ka dang sah ha ka Joint Cadre bad ka Assam bad kam pat don satia ki Ophisar kiba ha khlieh duh ha ka tnad pulit, ki ban shimti ïa ka kyrdan Director General of Police (DGP) lada kim dei kiba don ha ka Batch jong ka Assam Police Manual Act.
Ha kaba ïadei bad ka Indian Administrative Service Act kaba ngi tip kum ka kyrdan (IAS) ruh haduh mynta dang khyndiat ngut eh ki trai jylla kiba pass ïa katei ka kyrdan ban peit ïa ka Administration bad kiba dei ban bat ïa ki kyrdan bah eh ha ka jylla kum ki Chief Secretary, ki Director, ki Deputy Commissioners bad kiwei kiwei.
Hynrei kiba kham bun ki ophisar kiba ïoh ïa katei ka kyrdan ki dei kiba la shu kyntiew na ka jinglah treikam jong ki bad ka jingtrei slem ha ka kam, kum ki Meghalaya Civil Service (MCS). Hato haba ka long kumne ka sorkar ka kynmaw ne em ban phai dien kumno kan leh nangne shakhmat.