Mawkyrwat, Jymmang, 21: Ka ophis jong ka Deputy Commissioner, South West Khasi Hills District mynta ka sngi ka la shim ïa ka jingkular ha ka jingïalam jong ka kong C. Kharkongngor, IAS, kaba long ka Deputy Commissioner jong ka South West Khasi Hills District, Mawkyrwat kum shibynta jong ka jingrakhe ïa ka sngi pyrshah ïa ki seng lehnoh (National Anti Terrorism Day) kaba la ju rakhe ha ka 21 tarik u Jymmang man la u snem.
Ïa kane ka jingïalang la pynlong ha Multipurpose Hall, Deputy Commissioner’s Office, Laitlawsang ha kaba la wan ïashimbynta da ki ophisar bad ki nongtrei jong ka distrik baroh kawei.
Ha ka jingkren lamphrang ka kong C. Kharkongngor, IAS ka la ong ba la rakhe ïa kane ka sngi kum ka sngi pyrshah ïa ki lehnoh ha baroh kawei ka ri kum ka dak ban kynmaw ïa ka sngi ïap jong u Prime Minister barim ka India, u Rajiv Gandhi uba la ïap ha ki ktang kuli ki lehnoh ha kane ka sngi.
Ïa kane ka sngi la ju rakhe man la u snem da ka jingthmu ban pynkiar ïa ki khynnah samla na ki kam lehnoh ne ki kam pyntriem bad ban wad ki lad ki lynti ban ïaleh pyrshah ïa kiba kum kita kiba pyntieng, pynkyiuh ïa ka imlang ka sahlang bad ha kajuh ka por ban pynsaphriang ïa ka khubor ban pyrshah ïa kiba kum kine ki kam pyntriem kaba long ka jingma ïa ka shongsuk shongshngaiñ hapoh ka ri.
Shuh shuh ka la ong ba ka kam pyntriem ka dei ka jingsngewthuh jong ki katto katne ki seng kiba ïeng ban ïaleh pyrshah ban ïoh ïa kaei kaba ki ki thmu ne ki kwah bad ban khring ïa ka jingmut jingpyrkhat jong ki paidbah na ka bynta ka jingmyntoi jong ki. Ka la ong ba ki kam pyntriem kim dei kaei kaei kaba thymmai hynrei kaba baroh ki tip bad sngewthuhbha. Ka la pynkynmaw ruh ba 36 snem mynshwa ki la duh noh ïa ka Myntri Rangbah barim jong ka Ri, ka Indira Gandhi ha ki ktang suloi jong ki lehnoh bad da ki spah kiba la duh ei la ka jingim, kiba mynsaw bad kiwei kiwei ha ka dur jong ki kam pyntriem. Ka la ai ruh ïa ka nuksa jong ka Ri Afghanistan ha kaba la synshar da ki Talibans kiba la shah ñiew kum ki nongpyntriem ha ka pyrthei baroh kawei.
Namarkata, ha kane ka sngi ki dei ban shim ïa ka jingkular ban leh ei ei ha ka bor jong ngi khnang ban rat dyngkhong ïa kiba kum kine ki jingsniew kiba don ha ka imlangka sahlang khamtam ha kaba hikai ïa ki khynnah samla ban pynkiar bad ban ïada ïa ki khynnah na kiba kum kine ki seng khnang ba kin ïoh ïa ka imlang sahlang kaba shongsuk shongshngaiñ.
Hadien ka jingkren lamphrang la pynbud da ka jingshim kular ha kaba la ïalam khmat da ka kong C. Kharkongngor, IAS, Deputy Commissioner jong ka South West Khasi Hills District.
