Shillong, Naiwieng, 15: U Myntri ka tnat Border Area Development u Rakkam A. Sangma ha ka sngi Baar u la kyrpad ïa ka Sorkar Jylla ba kan pdiang ïa ka jingtyrwa ban pynïasoh da ka lynti Rel ïa ka shnong Baghmara kaba don ha South Garo Hills bad ïa ka nongbah Guwahati, Assam.
U Rakkam uba long ruh u MLA jong ka National Peoples Party (NPP) na Rongara-Siju, u la ong ba ka Meghalaya Land Transfer Act bad ki kyndon jong ka Khyrnit Bahynriew jong ka riti Synshar ka ri India ki dei ki ar tylli ki stieh ïada ïa ki nongshong shnong riewlum jong kane ka jylla Meghalaya haba kynthoh ïa ka jingpyrshah jong ki katto katne ki kynhun ïa ka jingthmu ban pynpoi ïa ka lynti Rel sha rilum Jaintia da kaba aidaw ba kan pynjur ïa ka jingwan rung kyrthep jong ki mynder ri bad ki briew kiba nabar jong ka jylla.
Ha ka jingïakren bad ki lad pathai khubor u Rakkam u la ong ba kane ka jingtyrwa ban pynïasoh ïa ka lynti Rel sha Baghmara ka dei kaba la slem bha naduh ka por ba u Captain Williamson Sangma u la long u Myntri Rangbah ka Jylla.
“Nga ruh nga dang dawa ban pynurlong ïa kane namarba ka Baghmara ka lah ban long ka lynti ïaid na ka bynta ka Meghalaya bad na ka bynta ka thaiñ Shatei Lammihngi ïa kaba yn pynïasoh lyngba ka nongbah Dhaka, Bangladesh. Ka khaii ka pateng bad ka jingpynkha ïa ki lad ïohkam kin kiew bad bun na ki samla bad ka khih ka kamai kan kiew,” u la ong bad bynrap, “namarkata, nga sngew dei ban dawa ïa ka Sorkar India bad ngan sa ïakynduh ruh ïa u Myntri Rangbah kum u MLA ban dawa ïa ka lynti rel kaba pynïasoh sha Guwahati sha Baghmara,” ula ong.
Katkum ka jingong jong u, ka la don ka jingdawa ban buh ïa ka Integrated Check Gate ha Baghmara khnang ba ki nongjngohkai pyrthei bad ki nongkhaii kin dup lah ban wan namarba lada wan ka Rel, ka ïoh ka kot jong ki briew kan kiew artet.
Haba kylli, hato un kyrpad neem ïa ka Sorkar ba kan ai noh ïa ka projek lynti Rel ba la tyrwa ïa ka Shillong bad Byrnihat sha ka Baghmara, u Rakkam u la ong, “lada long, ngan sa kyrpad ïa ka tnat Railway, ïa ka Sorkar India, ka Sorkar Meghalaya ban pynïasoh ïa ka Baghmara bad ka lynti rel na Guwahati.”
U la ai nuksa ruh da kaba ong, “manla u snem bun tylli ki Graduation bad ki Convocation kiba la nga la leit kum u Myntri ka tnat Pule Puthi ha kaba 18,000 hajar haduh 20,000 hajar ngut ki graduates bad ki Post-graduates ki don manla u snem. Na ki 20,000 ha ka sngi snem tang 1,500 – 2000 ngut kiba ïoh kam sorkar katba kiwei pat ki 18,000 ngut ki shu shong khlem kam khlem jam.”
Halor ka jingpyrshah ban wanrah ïa ka lynti rel ha rilum Khasi bad Jaiñtia, u Myntri u la ong, “haoid, ki don bun ki jingeh bad ngi hap ban peit kino ki jingmyntoi bad ki jingduh jingmyntoi. Lada wan ka lynti Rel sha Shillong ne East Khasi Hills ka lah ban don ka jingduh jingmyntoi bad ka jingmyntoi ruh kan don namarba kan pynsuk ïa ka leit ka wan bad kan plie ruh ïa ki lad ïohkam. Ki paidbah na rilum Garo ki leit thied jain na Dimpur namarba ka dor ka long kaba tad. Namarkata, nga kyrpad ïa ki paidbah ba kin shim rai ynda ki la pynshong nia ïa ki jingmyntoi bad ki jingduh jingmyntoi.
U la ong ruh ba ki paidbah ki dei ban ailad ban pynpoi ïa ka rel tang lada ki don ki aiñ bapyrkhing.
