Shillong, Naiwieng, 15: Kawei ka nongtrei Accredited Social Health Activist (ASHA) na Kyrdem Public Health Centre (PHC) ka ïoh jingsiew haduh T. 82,000 hajar namar ka jingtrei shitom bad ïoh ïa ka jingsiew kum ka Honorarium ha ki hynriew bnai ba la leit noh.
Ïa kane la pyntip da ka Myntri ka Koit ka Khiah ka Dr. Ampareen Lyngdoh ha ka sngi Balang haba kdew na ka Official Data ha kaba ïadei bad ka jingsiew ba la ai sha ki nongtrei ASHA ha ki 7,000 hajar tylli ki shnong kiba don ha kylleng ka jylla Meghalaya.
Katkum ka Official Data, bun na ki nongtrei ASHA ki ïoh ïa ka jingsiew na kaba ki trei kaba long T. 23,000 hajar haduh T. 82,000 ha ki hynriew bnai kata naduh ka 1 tarik, Ïaiong haduh ka 30 tarik, Nailur, 2023 da kaba kdew na ka tarik ba la siew lyngba ka Bank Account.
“Nga la peit bniah ïa ka jingsiew na kine ki rusit ba la siew sha ki ASHA ki ïoh ha ki block bapher bapher. Nga sngew kyndit ban ïohi ba kine ki nongtrei monsngewbha ki ïoh ïa ka jingsiew kaba heh,” la ong ka Dr. Ampareen haba ïakren bad ki lad pathai khubor hadien ba la wai ka jingïalang bad ki Ophisar jong ka tnat ka Koit ka Khiah.
Haba pynpaw ba ka jingïateh bad ki ASHA naduh ka sngi nyngkong ka long kaba shai ba ka dei tang ka kam trei monsngewbha, ka la ong ba kam shym la don kano kano ka jingkular ban siew tukop ne ka jingkular palat ïa kata lada ki ASHA ki trei.
Ki nongtrei ASHA kiba don hapoh ka shatri jong ka Meghalaya ASHA Workers’ Union (MAWU) ki la pynlong da ka jingïakhih kaba khlem pud sngi naduh ka 7 tarik mynta u bnai, kum ka dak ban pyrshah ïa ka jingleh mynthi ka Sorkar ïa ka jingdawa jong ki kaba kynthup ïa ka jingkyntiew ïa ka jingsiew na ka T. 2,000 sha ka T.5,000.
Ka Dr. Ampareen ka la ong ba ka don ruh ka jngsngewthuh bakla ba ka Sorkar kam shym la leh eiei na ka bynta ki ASHA bad ong, “ka kamram jong nga ka long ban pyntip sha ki paidbah ba kata kam long kaba shisha. Balei ngin leh kumta?
Ka la itahuh ba ka Sorkar ha u snem 2021-2022 ka la pynlut T. 91.2 klur na ka bynta ka jingsiew kaba manla u bnai ïa ki ASHA
Na kane, ka Sorkar ka la siew T. 16.32 klur na ka bynta ka Fixed Monthly Incentive jong ki ASHA bad la siew dep ruh ïa ka Backlog kaba T. 53 klur nalor ka T. 21.96 klur ïa kaba la siew hapoh ka NHM.
“Ha ki snem 2022-23, ka Backlog kam don eiei. Ngi dang tohkit ïa ka T. 16.98 klur ba la siew T.2000 sha ki ASHA bad ka jingsiew lyngba ka NHM ngi la pynlut T. 22.68 klur na ka bynta ki ASHA. Ka pisa baroh ka long T. Rs 40.5 klur,” ka la bynrap.
Da kaba kyrpad ïa ki nongtrei ASHA ba kin sangeh noh ïa ka jingïakhih bad ban wan sha ka miej jingïakren, ka Myntri ka la ong, “ban dawa ïa ka hok jong phi da kaba iehnoh ïa ka kamram ba phi trei ka dei ka bym lah satia ban pdiang. Ngi kwah ïa ka jingïatreilang jong phi. Ngi sngewnguh shikatdei eh ïa u synñiang ba la phi la trei.”
“Lada phi kwah ban ïakren, ka jingkhang ka plie. Ïa nga la phah sha kane ka ophis da ki paidbah. Nga dei ka jong ki paidbah bad ngan ïakynduh ïa phi bad wat wan da ka jingkhmihlynti ïa kaba ngam lah ban leh na ka bor jong nga.”
Ka Myntri ka la ai khublei ruh ïa ki ASHA kiba dang bteng ban trei ïa la ka kam wat hapdeng ka jingïakhih. “Namarba ki la ïohi ïa ka jingma jong ka jingim jong ki briew ha ki shnong ba ki trei, ki dang ïai bteng hi ban pyndep ïa la kamram,” ka la ong.
