Dei ban pynshai ki Singhania halor ka jingkynthoh ïa ka Eucharistic Procession : Adelbert

Shillong, Naiwieng 15: U MLA ka North Shillong constituency u Bah Adelbert Nongrum mynta ka Sngi Balang ula dawa na u S. Singhania ban pynshai halor ka jingkynthoh baka Sorkar ka la leh shilliang ban weng ïa ki jingeh kiba mih ha ka sngi iaid Eucharistic Procession kaba la long haka 12 tarik mynta u bnai.
Lah ban kdew ba u S. Singhania lyngba kawei kot khubor ula kynthoh tyngeh ïa ki bor district ka East Khasi daka ba kynnoh ba ka Sorkar ka leh shilliang ban weng ïa ki jingdheng kali haka por pynlong Procession da ka Balang Catholic hynrei ka Sorkar ka sted ban shim khia lada pynlong kiwei ki prokram kum ka Puja.
“Mano uta u S. Singhania, phi dei ne em u nongshong shnong ba pura ka Meghalaya ne phi dei tang uba sah wai hapoh ka Jylla. Nga sngewsih ïa ka jingkynthoh namar nga dei na ka Balang Catholic bad nga don lang ha kato ka sngi ba pynlong ïa ka Procession” la ong u Bah Adelbert.
U Bah Adlebert ula ong “Nga sngewkhia ïa kane ka jingkynthoh bad nga dawa ba phin mih shakhmat ban pynshai ïa la ka jingkren khamtam halor ka jingkynnoh baka sorkar ka shim khia tang haka por Puja”.