Shillong, Naiwieng 15 : Ka Joint Action Committee (JAC) kaba kynthup ïa ka NEHUTA, NEHUNSA bad ka NEHUNSA kumjuh ka NEHUSU ki la pdiang ïa ka jingtyrwa ban kynduh ïa u Vice Chancellor ka skulbah NEHU, u Prof PS Shukla ha ka sngi Palei ban ïa kren halor ki 9 tylli ki mat jingdawa ba ki buh.
Ka jingïakhih khlem buh por ba la khot da ka JAC ka la poi sha ka sngi kaba lai hynne ka sngi bad kane ka la ktah ïa ka jingïaid beit ïaid ryntih jong ka rukom treikam katei ka skul kynthup ruh wat ha ki kam kiba ïadei bad ka pule puthi ki samla.
“Ka JAC kan sa kynduh ha kane ka sngi Palei ïa u VC ha conference hall,” ong u Chairman ka JAC u Prof Lakhon Kma ha kane ka sngi Balang.
La pyntip ruh ba kan don ka jingkynduh lang jong ka JAC shabar ka ophis u VC hadien ka jingïalang ban pyntip halor ki mat jingïakren kiba mih hadine ka jingkynduh ïa u VC bad ruh na ka bynta ban rai pat ïa ki sienjam kumno ban leh nangtei shakhmat.
U Prof Kma u la pyntip ba ka jingïakhih ba khlem buh por kan bteng beit lada jia ba ka jingiakren kam poi shaei shaei ruh.
