Nongstoiñ, Naiwieng, 15: Ka HYC Lai Lyngdoh Circle ha ka sngi hat majai hapoh ka jingïalam u samla Wandap Marweiñ Pesident ka seng bad samla Willbirthsoon Kharsyiemlieh General Secretary ryngkat ki dkhot, ka la leit ïakynduh ïa u Executive Engineer Sahep S Massar jong ka PWD (Roads) Nongstoiñ, halor ka jingsniew ka surok Mawkaton-Nongstoiñ, kumjuh ruh ka jingkieng kaba don hapoh ka Shnong Mawkaton.
Ki nongïalam ka seng ki la pynpaw ba katei ka jingkieng ka la jot bha ka donkam ïa ka jingpynbha ban maramot, khnang ban lait na ka jingduh nong ïa ki paid nongshong shnong ha kitei ki thaiñ kiba pyndonkam ïa katei ka jingkieng. Kumjuh ruh katei surok ka la sniew shaba palat, ha kaba ka la long ka jingeh kaba khraw ïa kiba ïaid ba ïeng lynba ka tei ka surok khamtam eh ha ka pang ka shitom.
U Samla Willbirthsoon Kharsyiemlieh General Secretary ka HYC Lai Lyngdoh, u la ong na ka liang u Executive Engineer u la kular ban phai khmat ïa kitei ki mat bad ban pynbha noh kloi kloi ïa katei ka jingkieng bad ïa ka Surok ruh kin sa thaw lad kham kloi.
U la ng ruh ba ka HYC Lai Lyngdoh Circle ka pynpaw ïa ka jingai khublei ïa ka office baroh kawei, ïa ka jingkloi jong ki ban shimkhia halor kane ka bynta. Na ka liang ka seng ka kloi ban ïa trei lang ryngkat bad ka office, na ka bynta ka jingbha jong ka dong bad ka thaiñ hi baroh kawei.
