Haduh 14.03 klur ki projek kam pynroi ïoh ka Meghalaya na ka 42.63 klur ka skim NEC

Shillong, Risaw 09 : Ka Meghalaya ka la pyndep ïa ar tylli ki projek kiba kongsan kiba kot 14.03 klur, na ki projek baroh kiba ka North Eastern Council (NEC) ka la pyllait kiba kot baroh sha ka 42.63 klur ha u Nailur 2026 na ka bynta ki projek pynroi bapher bapher ha kylleng ka thain shatei lam-mihngi jong ka Ri.
Ka NEC ka la ong ba na ka pisa kaba la pyllait baroh, 35.21 klur ka la leit sha ki jylla ka Northeast, katba 7.42 klur ka la leit sha ki kynhun bad ki agency jong ka thaiñ na ka bynta ka jingpynkhlaiñ ïa ka bor trei, ki jingtei bad ka technology.
Kine ki ar tylli ki projek kiba la pyndep ha Meghalaya ki kynthup ïa ki building skul ha Mawthadraishan, West Khasi Hills, kiba kot 4.75 klur, bad ka Cultural Complex jong ka Seng Khasi Ri Raid Laban ha Lum Shat Sngi Kenches Trace, Shillong, kaba kot 9.28 klur.
Ha baroh, 14 tylli ki projek jingtei kiba kongsan kiba kot 45.48 klur ki la dep bad la pynkut noh ha une u bnai.
Napdeng kine ki kynthup ïa ka Music & Youth Activity Centre ha Yasogei, Kohima, Nagaland, kaba kot 9.17 klur; ka Auditorium bad ki jingdonkam ba kongsan ha Phek GHS kaba kot 1.92 klur; ka Girls Hostel (G+1) ha JN College, Pasighat, Arunachal Pradesh, kaba kot 4.27 klur; bad ka Backward Community Scheme na ka bynta ka Limboo Community ha Sikkim kaba kot 4.53 klur.
La pynkut ruh ïa ki lai tylli ki projek ha ka liang ka rep ka riang ha Karbi Anglong bad West Karbi Anglong ha Assam, kiba baroh lang ki kot 11.55 klur. Kine ki kynthup ïa ka Lumbajong Development Block kaba kot 4.97 klur, ka shnong Sarmen Hanse kaba kot 1.97 klur bad ka Chinthong Block kaba kot 4.61 klur.
Kiwei pat ki projek kiba la pynkut ki kynthup ïa ka jingpynbiang ïa hynñiew tylli ki bamboo processing prototype processors lyngba ka NECBDC kaba kot 2.10 klur; ka IT Education Programme kaba kynthup ïa 150 tylli ki skul ha Mizoram kaba kot 11.08 klur; ka AVGC bad IT-ITES training gap-funding; AI & Emerging Technologies Seminar; NSSS 2026; bad ka She-Friendly Programme kaba kynthup ïa 20 tylli ki jaka pule ha Shillong.
Katkum ki jylla, ka Nagaland ka la ïoh 11.92 klur na ka bynta ka jingpynroi ïa ka coffee value chain bad ka Cultural Activity Complex ha Pfutseromi Village.
Ka Mizoram ka la ïoh 6.29 klur na ka bynta ka auditorium ha Champhai, ka jingtei ïa ki jingdonkam jong ka cultural tourism ha Vangchhia, ka jingrep ïa u sying, ka mineral mapping bad ki jingtei ban pyndonkam paidbah ha Siaha.
Ka Assam ka la ïoh 4.42 klur na ka bynta ki hostel ha Bineswar Brahma Engineering College, Kokrajhar bad ki jingtrei kiba ïadei bad ka Singpho ha Tinsukia. Ka Sikkim ka la ïoh 4.17 klur na ka bynta ka CCTV surveillance bad multipurpose hall ha Rhenock College.
Ka Arunachal Pradesh ka la ïoh 3.40 klur na ka bynta ka nursing hostel ha Yingkiong, Acheso tourism complex bad Ziro View Point.
Ka Tripura bad Manipur ki la ïoh ïa ki jingpyllai pisa na ka bynta ki projek kiba dang ïaid, kiba kynthup ïa ka Model Haat, ka jingpynbha ïa ki Eco-Park, ki prokram ha ka sngi kha jong u Birsa Munda, ka jinglum jingtip shaphang ki dawai kynbat, Museum-cum-Library bad ki unit ban lum ïa ki jaboh kiba wan lyngba ki wah.
Ka jingbhah pisa sha ki kynhun jong ka thaiñ kaba kot 7.42 klur ka kynthup ïa 2.88 klur na ka bynta ka NECBDC ban pynroi ïa ki bamboo clusters, 2.35 klur na ka bynta ka NEHHDC ban pynkhlaiñ ïa ka sap ha ki kam thain kti, bad 1.24 klur na ka bynta ka NECTAR ban pynbiang ïa ki STEM labs ha ki skul kiba don sha ki jaka ba jngai, nalor ka jingïarap sha ka NEDFi, NIT Meghalaya, IIM Shillong, NEHU bad NESAC.