Shaduh Dubai, USA phah ki briew ïa ki tiar ohshrong bad ba la pynitynnad jong u Bah Cliford Pde

‘Nga kloi ban hikai ei ïa ki samla donsap’

Shillong, Risaw 09: U Blei u la ai la ki jong ki jong ki sap ïa manla uwei pa uwei u briew ban trei la ki jong ki jong ki sap, hynrei ka sap kaba kham kyrpang napdeng ki khun Khasi Jaiñtia u la ai kyrpang ha u Bah Cliford Pde uba na Chlliang Raij Jowai na West Jaiñtia Hills District ban shna bad ohshrong ïa kiba bun ki jingshna kiba dei tang na kawei ka dieng bad kine ki tiar ki la kiba itynnad shisha.
Halor kane haba kren bad u Mawphor u Bah Pde u la ïathuh ba u la sdang ïa kane ka kam naduh ka por ba wan ka khlam Covid ne ka Lock Down, wat ba mynshwa u niah kali tourist, bad ba u la don kane ka sap naduh mynshwa.
Ka jingwan ka khlam ka la pynlong ïa u ban pynleit jingmut noh ha ka kam lajong da kaba ohshrong ïa kiba bun ki dur ban shna pat da ki dieng khnang ba un lah ban pyndap ïa la ka jong ka ïing ka sem.
Kine ki tiar jong kiba u la ïaibteng ban ohshrong haduh mynta u la ïoh ki order ruh shaduh Dubai, United States of America bad kiwei ki ri kynthup ruh hapoh ki jylla ka ri India.
U la ïathuh ba kine ki tiar kumba long mynta la lah ban die bad kila poi haduh T. 15 lak eiei bad u la ïathuh ba u long ruh uba kloi ban ai jinghikai ei ïa ki khun samla kiba don sap bad ba kim dei ban shaniah than eh tang ha ki kam sorkar hynrei ban ïeng ha la ki jong ki kjat.
Ïa kine ki tiar u la wan ban pyni nam bad die hapoh ka programme MSME ba ar Sngi ha State convention centre ba la pynïaid da ka Directorate of Commerce and Industries ka sorkar Jylla.
Une u Rangbah u la ong ba wat kiba na Shillong ruh ki lah ban wan sha ka jaka kaba u la buh ha Mihmyntdu ban shah hikai kumno ban ohshrong ïa ki tiar kiba u la pynkhreh ha ka jaka kaba u ju shna ha ryngkat ka jingdonlang ki nongïarap kiba u la buh kyrpang.