Da ka surok 4-lane na Umïam haduh Nongbah Shillong buh thong ka Sorkar Jylla ban shna

Shillong, Jymmang 17 : U Symbud Myntri Rangbah ka Jylla ba peit ïa ka tnad PWD, Bah Prestone Tynsong u la ïathuh ba ka sorkar jylla ka dang ïakhun mynta ban ïoh shna noh da ka surok four-lane naduh Umïam ter ter haduh ban da poi sha Nongbah Shillong khnang pynkylluid bad pynsuk ïa ka leit ka wan ki paidbah lyng katei ka surok bah.
Haba kren ha kawei na ki jingïalang dang shen, u Symbud Myntri Rangbah u la ïathuh ba ka PWD ka la aiti ha ka NHIDCL ba kin pyntrei ïa kane ka projek naduh Umiam kaba kynthup naduh ka lad fly-over haduh nongbah Shillong. “Ngi la don ka jingïalang arsien lai sien ha kaba ngi pynbeit kumno ban pynbit pynbiang ïa kane ka jingtrei ban poi sha Shillong,” u la ong.
U la ïathuh ba katkum ka jingïakren pynbeit, kan don ka surok four-lane bad kan don ruh ka surok two-lane bad ba kan long ruh ka surok greenfield.
“Tangba haduh mynta ngim pat lah ban poi sha ka rai kaba khatduh namar ngin dang hap ban shong jingïalang biang bad ka NHIDCL ha Delhi ha kane ka sngi Nyngkong. Kumta ngi kyrmen skhem ba ngin ïohi ïa ka surok four-lane na Umïam haduh nongbah Shillong. Hynrei lada jia ba ym lah da ka four-lane la kumno kumno da ka standard double-lane kaba paka,” u la bynrap shuh shuh.
Katkum ka jingong jong u Symbud Myntri Rangbah, lada ki ïoh ban wanrah da ka surok four-lane lane da ka standard double-lane kan long ka jingmyntoi kaba khraw ïa ki paidbah ba leit ba wan bad pyndonkam da kane ka surok namar ka lynti ka la kham heh bad kham kylluid.
Ha kajuh ka por u Symbud Myntri Rangbah u la pyntip ruh ba ka sorkar jylla ka la theh bun bha ka mang pisa khamtam haba ïadei bad ka surok. U la ïathuh ba tang hapoh kane ka snem mangtyngka (financial year 2025-2026) ki la lah ban mang tyngka bun bha ki surok ha kylleng ki bynta jong ka jylla ym duna ïa ka 2400 klur tyngka.
Shuh shuh u la ïathuh ba 2000 klur tyngka ka dei na ka State Plan, 261 klur na ka CRF bad kumba 130 klur tam pat ka dei na ka RIDF. Nangta u ong ba um pat khein satia ïa ki projek kiba wan na kiwei pat ki tyllong kum ki external aided project (EAP).
“Nga ïathuh ïaphi tang ïa ki projek kiba ngi ai ka mang tyngka na ka state plan jongngi lyngba ka jylla Meghalaya. Nga kyrmen skhem ba kane ka 2400 klur tyngka kaba ngin treikam mynta kane ka snem mangtyngka 2026-27 ngin ïohi ïa ka jingkylla jong ka jylla Meghalaya jongngi baroh kawei ha kylleng ki shnong baroh,” u la ong.