SHILLONG, Jymmang 18: Ka Iaitylli S&CC ka la ïoh ban khur ïa ka jingjop hadien ba ka la pynliem noh da 2-1 kol ïa ka Laitlyngkot SC ha ka jingïalehkai jong ka Group F ha ka lympung U-20 4th Division Football League 2026 jong ka Shillong Sports Association, hynne ka sngi Nyngkong ha madan MFA.
Shuwa kane, ka jingïalehkai hapdeng ka Gorkha Association bad ka Iateilang SC ka la kut ha ka jingïakhaid, ha kaba baroh ar ki la thep mar shi kol (1-1). Ha ka jingïakhun dei ka Iateilang SC kaba la pynkhihjar nyngkong lyngba u Teiborlang Kharsahnoh (15’) hynrei ka Gorkha ka la pynïakhaid lyngba u Leric Kordor Nongkynrih (36’min).
Ha ka jingïalehkai kaba bud, ki ar kol jong ka Iaitylli S&CC la thep da u Banbisharlang Mawlong (25’min) bad u Jovialson Kharnaior (30’min), katba ka Laitlyngkot SC ka la thep lyngba u Namebantei Nongkynrih (43’min).
Ka prokram ïalehkai jong ka SSA U-20 4th Division Football league 2026 ha kane ka sngi Ba-ar (19.5.2026) kan dei jong ka Group A, ban sdang ha ka por 1 baje mynsngi hapdeng ka Riatsamthiah SC pyrshah ïa ka Imson SC, nangta bud sa ka jingïalehkai ha ka por 4 baje janmiet hapdeng ka Lumkseh SC pyrshah ïa ka Them Rangshken SC. Baroh ar kin long ha MFA Ground.
