5th M’laya State League: Pynliem ka Nongkseh ïa ka Lajong ban jam sha ha khlieh duh ka Group A; Jop ka Mawlai ïa ka Rangdajied

Shillong, Jymmang 18: Ka Nongkseh SSCC ka la jam sha khlieh duh jong ka Group A ha ka wat ïakhun Quarterfinal jong ka lympung 5th Meghalaya State League da kaba pynliem ïa ka Shillong Lajong FC da 2-0 kol ha ka jingïakhun kaba la long hynne ka janmiet sngi Nyngkong ha madan First Ground-SSA Stadium.
U Sheen Sohktung (67’) bad u Mebankhraw Wahlang (70’) ki la pynkhihjar na ka bynta ka Nongkseh ha kane ka jingïakhun kaba la kiew stet kum ka jingïakhun kaba khraw hapdeng ar tylli ki kynhun ba khlaiñbor ha Shillong bad ka Meghalaya.
Ha ka jingïalehkai kaba kham hashwa, ka Mawlai SC kaba bat ïa ka nam lahduh, ka la khur ïa ka jingjop kaba nyngkong ha ka wat ïakhun jong ka Quarterfinal da kaba pynliem ïa ka Rangdajied United FC da 2-1 kol.
Ka kylla step jong ka jingïakhun hapdeng ka Lajong bad ka Nongkseh, kaba la ïalehkai ha khmat ki paidbah kiba pyndap ïa ka Stadium, ka la long kaba kham jai jai namar ba baroh arliang kim shym la kwah ban shah thep. U Wilbert Marbaniang u la ïoh ïa kawei ka kabu kaba thikna na ka bynta ka Lajong tang ha ka minit kaba 9 hynrei ka jingpyrshang jong u ka la shah khanglad ha u nongap kol ka Nongkseh u Guidle Syiemlieh.
Hynrei ha kaba kut, ka jingïalehkai ka la kylla tang hapoh katto katne minit. Ka Nongkseh ka la kham ïalehkai bha ha ka kylla miet bad baroh arngut u Sheen bad u Mebankhraw ki la ïoh ban pynkhihjar, kaba la bud kawei hadien kawei hapoh 2 minit.
Ka Nongkseh ka la kamai mynta 7 point naki lai tylli ki jingïakhun, katba ka Lajong ka la hiar sha ka kyrdan ba ar da 6 point. Ha kajuh ka por kane ka nam rem ka la pynkut noh ïa ka jingjop kaba 9 sien lynter jong ka SLFC.
Ha kawei pat ka jingïakhun, u Basuklang Bina (39′) bad u Kevin Rymbai (61′) ki la pynkhihjar na ka bynta ka Mawlai katba u Mebannangkiew Thabah (45’+1) u la thep na ka penalty ban pynïakhaid shipor na ka bynta ka RUFC.
Baroh ar liang ki la shah kyntait mar kawei ka kol ha ka kylla step namar ka offside hynrei kam shym la don kano kano ka jingpynkylla ïa ka kol jong u Basuklang uba u la pyllait lyngba katto katne ki nongïalehkai ba shadien shuwa ban pynkhihjar. Hynrei ka Mawlai kam shym la lah satia ban bat skhem ïa ka kol lamkhmat, ha kaba ka Rangdajied ka la pynïakhaid tang shuwa ban jam sha ka por shongthait na ka penalty ba la shut da u Mebannangkiew.
Ka kylla miet ka la long hapdeng u slap uba jur, kaba la pynlong ïa ki jinglong jingman jong ka madan ban kham eh ïa ki nongïalehkai. Watla katta ka Mawlai, da ka jingdon jong katto katne ki nongïalehkai kiba la kham shemphang, ka la lah ban pynïahap ïalade bad ka jinglong jingman ka madan bad u Kevin, uba la shah bujli ha kaba sdang jong ka kylla miet, u la ïoh ban thep na ka bol pashat jong u Jestibor Mawlong ban buh biang hakhmat ïa ka Mawlai, kaba la bat skhem haduh kaba kut.
Ka Mawlai mynta ka la khur 4 point naki lai sien ïakhun. Katba ka Rangdajied ka dang sah khlem kamai wat tang shi point (0) wat hadien ba ki la ïalehkai bha ha kane ka quarterfinal stage hynrei sniewbok ba ki la shah rem tang da ka jingïapher kol kaba rit ha baroh lai tylli ki jingïalehkai, kaba buh ïa ka kynhun ha ka jingeh kaba khraw lada ka angnud ban rung sha ka semifinal.
Ha kane ka sngi Ba-ar ki kynhun jong ka Group B kin wanphai biang sha ka jingïakhun, ha kaba ka Nangkiew Irat SC kan aireng ïa ka Langsning FC ha ka por 2 baje nohphai sngi bud da ka jingïakhun hapdeng ka Maram FC pyrshah ïa ka Rymbai Shkenshynriah SC ha ka por 6 baje janmiet.